Aqtóbelik sheneýnikter syılyqqa alǵan shaı men ishimdikti memleketke tapsyrdy
AQTÓBE. QazAqparat - Memlekettik qyzmetkerler syıǵa alǵan zattaryn memleketke tapsyrdy. Endi aqtóbelik sheneýnikterge syıǵa berilgen shaı, qymbat ishimdik pen kartınalar satýǵa shyǵarylady, dep habarlaıdy QazAqparat tilshisi.
Memlekettik qyzmetkerlerge syılyq alýǵa tyıym salynǵany belgili. Jyl basynan beri aqtóbelik qyzmetkerler 12 zatty QR Qarjy mınıstrligi, Memlekettik Múlik jáne jekeshelendirý komıtetiniń Aqtóbe memlekettik múlik jáne jekeshelendirý departamentine tapsyrdy. Olardyń ishinde avtorlyq kartınalar, shokoladty jent pen shaı bar. Sonymen qatar, «Scottish Hunter» ishimdigi de tapsyrylǵan. Qobyz kádesyıy, birneshe banktiń blaknoty men shaı ishýge arnalǵan ydys-aıaq, qoraptaǵy konfetti memlekettik qyzmetkerler departamentke bergen. Endi bul zattardyń bári satylymǵa shyǵarylady.
«Memlekettik qyzmet týraly» Zańǵa sáıkes memlekettik qyzmetkerlerge berilgen syılyq arnaıy qorǵa tapsyrylýy tıis. Syılyqtyń bári Memlekettik múlik jáne jekeshelendirý departamentine berildi. Aldaǵy ýaqytta syılyqtar satýǵa shyǵarylady», - dedi QR Memlekettik qyzmet isteri jáne sybaılas jemqorlyqqa qarsy is-qımyl agenttigi oblystyq departamentiniń baspasóz hatshysy Mahabbat Darmysheva.
