Aqtóbelik sheneýnik qolastyndaǵy qyzmetkerdi urǵan
AQTÓBE. QazAqparat - Agroónerkásip keshenindegi memlekettik ınspektsııa komıteti oblystyq ınspektsııa basshysynyń orynbasary Erlan Orynbaev kadr qyzmetshisin urǵany úshin jumysynan qýyldy, dep habarlaıdy QazAqparat tilshisi.
Memlekettik qyzmet isteri jáne sybaılas jemqorlyqqa qarsy is-qımyl agenttiginiń Aqtóbe oblysyndaǵy Ádep jónindegi keńesi otyrysynda Erlan Orynbaevqa qatysty tártiptik is qarady.
«Inspektsııa basshysynyń orynbasary Erlan Orynbaevqa qatysty tekserý júrdi. Aryzdanýshy, kadr bóliminiń mamany Gúlmıra Jıdebaevanyń aıtýynsha, 2018 jylǵy 19 qazanda basshynyń orynbasary E.Orynbaev ózine qol kóterip, «óltiremin» dep aıtqan. Al E. Orynbaev óz kinásin moıyndamaı otyr. Alaıda eki adam arasyndaǵy urysty áriptesteri estip, rastap otyr. Oqıǵa ornyna polıtsııa men jedel járdem shaqyryldy. Sot-medıtsınalyq saraptama kezinde jábirlenýshiniń basy men ıyǵynda urǵannan qantalǵan jerler anyqtaldy. Qazir qylmystyq is te qozǵalýda», - dedi Memlekettik qyzmet isteri jáne sybaılas jemqorlyqqa qarsy is-qımyl agenttiginiń Aqtóbe oblysyndaǵy departamenttiń bas mamany Nurhat Muńaıtpasov.
Ádep keńesine sheneýnik kelip, oqıǵanyń óz nusqasyn aıtyp berdi. Ol jábir kórgen G.Jıdebaeva hatqa jaýap berý ýaqyty ótip ketken kezde qol qoıdyrýǵa kelgen kezde, tek daýys kótergenin jetkizdi.
«Men týraly jalǵan aqparat berip jatyr. Men 1999 jyldan beri bir salada eńbek etip kelemin. Birde bir sóz estip, jumysym synalǵan emes. Ol maǵan daýys kóterdi, ózime qaraı umtyldy. Sol kezde qolyn ustap qaldym», - dedi Erlan Orynbaev.
Al Gúlmıra Jıdebaeva soqqy alǵanyn, jábirlegenin, ádil sheshim shyǵarýyn surady. Ádep keńesi biraýyzdan Agroónerkásip keshenindegi memlekettik ınspektsııa komıteti oblystyq ınspektsııa basshysynyń orynbasary Erlan Orynbaevty jumystan shyǵarý týraly uıǵarym berdi.
Qazirgi kezde Ulttyq bıýronyń oblystyq departamenti qylmystyq isti tergen jatyr. 
