Aqtóbelik sheber japyraqqa Qaırat Rysqulbekovtyń portretin saldy
AQTÓBE. QazAqparat - Aqtóbelik sheber Altynbek Seıdalıev Táýelsizdik kúni qarsańynda Halyq qaharmany Qaırat Rysqulbekovtyń portretin saldy, dep habarlaıdy QazAqparat tilshisi.
Aqtóbe oblysy, Alǵa aýdanynynda turatyn Altynbek Seıdalıev buǵan deıin ánshi Dımash Qudaıbergen, boksshy Gennadıı Golovkınniń portretin salǵan bolatyn. Buǵan deıin habarlaǵanymyzdaı, sheber biregeı tehnologııa arqyly japyraqty shaıǵa qaınatyp, bastyrady, keıin mıkroskoppen sýret salady.
«Táýelsizdik kúnine oraı Qaırat Rysqulbekovtyń sýretin saldym. Men kez kelgen adamnyń portretin salmaımyn, bári júrek qalaýymmen, tańdaýymmen bolady. Ári sýret salǵan kezde janym tynyshtyqty qalaıdy, eshkim kedergi keltirmeıdi»,- dedi Altynbek Seıdalıev.
Sheber aldaǵy ýaqytta kimderdiń portretin salatynyn aıta almady. Sebebi, ol japyraqqa portret salar kezde eshqandaı jospar qurmaıdy. Gúl satatyn dúkenderge baryp, japyraq tańdaǵandy unatatyn ol mýzeıge buıymdaryn tapsyrmaǵan. Bári ózinde, mektepte saqtaýly. Al arnaıy jasalǵan portretter kóbine syıǵa beriledi.
