Aqtóbelik sheber úıindegi ydys-aıaqtyń bárin aǵashtan jasap aldy

Aqtóbe oblysy, Mártók aýdanynda turatyn sheber Edilbaı Orazymbetov balalarǵa dáris berip, aǵashtan buıym jasaýdy úıretedi. Ózi arnaıy bilim alyp, osy salada 40 jyldan beri jumys istep keledi. Ári bala kezden qolóner buıymdaryn jasaýǵa beıim, aǵash, temir, teriden kez kelgen zat qurastyra alady. Óz úıindegi ydys-aıaqtyń bárin aǵashtan jasap qoıǵan.
 

«Úıimdegi ydys-aıaqtyń bári aǵashtan jasalǵan. Sońǵy kezderi et tabaqtary aǵashtan jasalyp, soǵan suranys atty. Tabaqty paıdalanatyn bolsaq, syrlamaımyz, óńdelgen aǵashty sol kúıi kádege asyrady. Sol kezde ettiń dámi ózgeshe bolady. Al syrlanǵan ydys-aıaq sánge qoıylady, kádesyı retinde saqtalady. Aǵash buıymdar jasaýǵa arnalǵan shıkizatty kez kelgen jerden alýǵa bolady. Aýla ishindegi, ormandaǵy qýraǵan, kesilgen aǵashtardy paıdalanamyz. Qaraǵash kóp, sol bizge jetkilikti»,- dedi sheber Edilbaı Orazymbetov.
 

Aǵash buıymdaryn jasaýǵa arnalǵan shıkizat, ıaǵnı, aǵashtar buryn maldyń qıynda saqtalǵan. Qı birqalypty temperatýrany saqtaıdy, aǵashty óńdeýge yńǵaıly. Al qazir bul ádis qoldanylmaıdy. Sheber Edilbaı Orazymbetov tuzdy sýǵa aǵashty salyp qoıyp, keıin óńdeý tásilin paıdalanady. Ol bar bilgeni men túıgenin mektep oqýshylaryna úıretip júr.

«Qazir balalardy qyzyqtyrý óte qıyn. Sońǵy ýaqytta er balalar keme maketin jasaıdy. Aǵash óńdeý, joný, kesýdiń bárin úırengen bala shydamdylyqty meńgeredi, uqypty bolady. Olar ár buıymdy jasaý tehnologııasyn meńgerip, keıin óz úıine qajetti buıymdar jasaı alady. Kún ótken saıyn qyzyǵyp, úıirmelelerge qatysatyn balalar kóbeıip kele jatyr. Ári bilgenimizdi áriptesterimizge úıretin, ustazdardyń biliktiligin arttyrýǵa kómektesip júrmiz»,- dedi sheber.
 

Aıta keteıik, Edilbaı Orazymbetov kóptegen kórme-jármeńkelerge qatysyp júr. Ol sońǵy jyldary qazaqtyń ulttyq buıymdaryna suranys artyp, tapsyrys berýshilerdiń kóbeıgenin jasyrmaıdy. Qazir Aqtóbede aǵash ydys-aıaqtar sánge aınalyp, tutynýshylar arasynda sheberlerge tapsyrys beretin adamdardyń qatary artty.