Aqtóbelik sheber qoldan jasalǵan quralmen kilem toqyp júr

Jasy 80-nen asqan Múslıma Dúısebaeva kilem toqýdy jastaıynan meńgerip, keıin turmys qurǵan soń bul isin jalǵastyrady. Joldasy arnaıy qurylǵyny aǵashtan jasap berip, qazir úıiniń bir bólmesin sheberhana etip jabdyqtaǵan. Ol jerde kilem toqylady, kıim tigiledi.




«Anam 40 jyldan beri kilem toqyp júr. Bul ónerin eshkimge aıtpady, jaryqqa shyǵarmady. Otbasy múshelerine arnap toqyǵan kilemderge adamdardyń aty jazýly tur. Máselen, maǵan arnap Kamshat degen ataýmen shaǵyn kilemshe toqydy. Kilemsheniń boıaýy ketpeıdi, sozylmaıdy. Anamnyń qolynan shyqqan buıymdy ilip qoıyp júrmin»,- dedi Kamshat Dúısebaeva.

Buryn ár úıdiń qabyrǵasynda kilem ilýli turdy. Bul eskiliktiń belgisi bolǵanymen, Dúısebaevtar otbasyndaǵy sheberhana ishi ózderi toqyǵan kilemmen jabdyqtalǵan. Bul otbasy ázirge tapsyrys qabyldamaǵan. Degenmen Temir aýdanynyń ákimi ata-anasyna arnatyp kilem toqytyp alsa, sheber Múslıma Dúısebaeva oblys ákimi Berdibek Saparbaevtyń aýdanǵa sapary kezinde oǵan syı jasap, qorjyn berdi.




«Anam «Táýelsizdikke 25 jyl» degen jazýmen eni 1, uzyndyǵy 2 metrden sál asatyn kilem toqydy. Eki aı tapjylmaı otyrdy, eńbektendi. Sonymen qatar, buryn Ahmet Baıtursynovtyń portretin de toqyǵan. Ony murajaıǵa syıǵa berdi. Tyqyr kilem óte tózimdi. Uzaq jyl ótse de syryn bermeıdi. Buryn kilemge arnalǵan jipti ıiretin, qazir daıyn jipti satyp alady. Kilem toqý óte qıyn ári tapjylmaı otyrýdy talap etedi. Toqylǵan kilemniń eń úlkeni otbasynda tur. Eni eki, uzyndyǵy úsh metr bolady»,- dedi Kamshat Dúısebaeva.




Sheber Múslıma Dúısebaevaǵa nemeresi Perızat kómektesedi. Bıyl 8 jasqa tolǵan qyz toqýdyń qyr-syryn 4 jasynan bastap úırengen eken. Sońǵy úsh jylda 8 kilem toqyǵan sheber aldaǵy ýaqytta naqty usynys tússe tapsyryspen eksklıýzıv kilemder toqýdy qolǵa almaq. Al qazir sheberhanadaǵy tigin mashınasymen jıi jumys isteıdi. Ulttyq kıimder tigedi, balabaqsha balalaryna arnap túrli keıipkerdiń beınesin somdaıtyn qýyrshaqtar daıyndaıdy.