Aqtóbelik sheber qarda júretin kólik qurastyrdy
AQTÓBE. QazAqparat – Aqtóbelik sheber sharýa qojalyǵyna qarda júretin kólik qurastyryp berdi. Eski «Jıgýlıdiń» dońǵalaǵy shynjyr tabandy ári shańǵysy bar, dep habarlaıdy QazAqparat tilshisi.
Aqtóbeniń Alǵa qalasynda temir ustasy sharýa qojalyǵynyń basshysy Bekturǵan Іdirisovtyń ótinishin oryndap, eski «Jıgýlıdi» qaıta kádege jaratty. Bul qajettilikten týǵan kólik. Aýdannan 30 shaqyrym jerde mal baǵatyn sharýa qystaǵy boranda qatynassyz qalyp, qınalǵan soń amalyn tapty.
«Bul 2007 jyldan beri oıda júrgen jumys edi. Temir ustasyna ótinish jasaǵanda ol birden kelisti. Eski «Jıgýlıdi» men kórshimnen aldym. Ol buǵan deıin buzylyp, bos turǵan bolatyn. Bári kádege jarady. Eń qymbaty shynjyr taban boldy. Árqaısysyn 300 myń teńgege satyp aldyq. Kóp jumys temir ustasynyń enshisinde», - dedi sharýa qojalyǵynyń basshysy Bekturǵan Іdirisov. Onyń aıtýynsha, qarda júretin kólik qymbat. Eń arzany 5-6 mıllıon teńge turady. Ári qysta salqyn, jańa kólik ishi jyly.
«Alǵashqy synaqty jasap, aýyl ishinde júrip kórdik. Jaramdy, yńǵaıly. Kórip, bilgen soń adamdar habarlasyp, keıbiri 15-20 kún buryn joǵalyp ketken jylqysyn izdeýge kómek surady», - dedi kásipker.
Temir ustasy qazir kólikti synaqtan ótkizip, qajetti bólshekterin ózi jasap jatyr.
«Maǵan jańa dúnıe jasaý, ony synaqtan ótkizip, kádege jaratý óte qyzyqty. Sondyqtan bul jumysqa qýany kelisip, kólikti júrgizdim. Kólik qarda jaqsy júredi», - dedi mehanık ıÝrıı Gegelman.
