Aqtóbelik sharýalar paıdalana almaǵan jerlerin memleketke qaıtaryp jatyr
AQTÓBE. QazAqparat - Bıyl Aqtóbe oblysy boıynsha aýyl sharýashylyǵy maqsatyndaǵy 38 myń gektardan astam jer memleket menshigine qaıtaryldy. Oblystyq jerdiń paıdalanylýy men qorǵalýyn baqylaý jónindegi basqarma jerdi maqsatty paıdalanbaǵan sharýalarǵa aıyppul salyp jatyr, dep habarlaıdy QazAqparat tilshisi.
Jerdiń maqsatty paıdalanylýyn baqylaıtyn basqarma sotqa aryz túsirip, bos jatqan jerlerdi qaıtaryp jatyr.
«Bıyl 126 agroqurylymǵa baqylaý júrgizip, jerdiń paıdalanylýyn qarap shyqtyq. Aýyl sharýashylyǵy maqsatyndaǵy 38 myń gektar jerdi sharýalar óz erkimen memleket menshigine qaıtardy. Sonymen qatar, 14 sharýaǵa 2 mıllıon teńge aıyppul salyndy. Qazirgi ýaqytta úsh sharýashylyq boıynsha ákimshilik is sotta qaralyp jatyr. Jerdi maqsatty paıdalanbaı otyrǵan sharýalar óz erkimen memleket menshigine jerdi qaıtarmasa, májbúrlep qaıtarý úshin talap-aryzdy ekonomıkalyq sotqa joldaımyz. Qazir Baıǵanın men Mártók aýdanyndaǵy sharýalardyń jerin qaıtarý isi sotta qaralyp jatyr», - dedi Aqtóbe oblystyq jerdiń paıdalanylýy men qorǵalýyn baqylaý jónindegi basqarma basshysy Abdýahat Myrzalın.
Aıta keteıik, memleket menshigine qaıtarylǵan aýyl sharýashylyǵy maqsatyndaǵy 56 myń gektardan astam jerdiń tek 21 myń gektary qaıta aınalymǵa engizilgen. Ózgesi aýdan, qalanyń bosalqy jer qorynda tur.
