Aqtóbelik sharýalar maqsary ósirýdiń artyqshylyǵymen tanysty
Aqtóbe aýyl sharýashylyǵy tájirıbe stantsııasynda «Aımaqtyń ártúrli topyraq-klımattyq jaǵdaıynda maıly maqsary daqyldaryn ósirýdiń ınnovatsııalyq tehnologııalary» atty ǵylymı-praktıkalyq semınar ótti. Ǵylymı qyzmetkerler maqsary ósirýdiń qyr-syrymen bólisti.
Aıta keteıik, oblystaǵy 805 myń gektar egistiktiń 18 myń gektary maıly daqyldar, onyń 11 myń gektary maqsary. Aqtóbede Hromtaý, Qobda, Muǵaljar, Mártók jáne Alǵa aýdandary ǵana maqsary egedi.
«Maqsary ósirýdi Mártók aýdanynan bastadyq. 2015 jyly «ASHOS» JShS «Dına» sharýa qojalyǵyna 10 jyl ishinde jeke selektsııa nátıjesinde alynǵan «Ahram» ózindik tuqymyn berdi. Birinshi jyly 700 kg tuqymnan 22 tonna ónim aldy. Kelesi jyly 700 gektar jerge egin egilip, 560 tonna tuqym alyndy. Bul osy daqyldyń jaqsy ósetinin kórýge bolady», - Tájirıbe stantsııasyndaǵy aýyl sharýashylyǵy jáne maqsary bóliminiń bastyǵy, aýylsharýashylyq ǵylymdarynyń kandıdaty Aıbatsha Jubanysheva.
Aýyspaly egis júıeleri, topyraqty óńdeý, ósimdikterdi baqylaý men qorǵaý jan-jaqty túsindirildi.
«Maqsary shuǵyl kontınentti klımatqa beıimdelgen jáne qurǵaqshylyqqa tózimdi ósimdikterdiń qataryna jatady. Onyń tuqymynan baǵaly maqsary maıyn alynady. Tamaq isteýge, tehnıkalyq maqsattar úshin maıdy paıdalanýǵa bolady. Óńdelgen ónimder janýarlar men qustar úshin joǵary qorektik taǵam bolyp tabylady. Sonymen qatar maqsary gúliniń japyraqtary medıtsınada qoldanylady» - dedi Aıbatsha Jubanysheva.
Semınar óńirlik kásipkerler palatasy men Aqtóbe aýyl sharýashylyǵy tájirıbe stanıtsııasynyń qoldaýymen, «Atameken» QR Ulttyq kásipkerler palatasy agrokeshendik ortalyǵynyń uıymdastyrýmen ótti.
