Aqtóbelik sal aýrýyna shaldyqqan balalardy atqa mingizip tegin emdeıdi
Aqtóbe jastary «Zhas project» jobasyna qatysyp, kásibin bastady. Bıyl jas kásipkerlerdi qoldaýǵa bıýdjetten 40 mıllıon teńge qarjy bólindi. Sonymen qatar, Aqtóbede jastardyń bastamalaryna kómektesetin arnaıy tálimgerler oqytyldy. Máselen, Rahat Baqdáýletov óz isin áleýmettik jelilerde jarnama taratýdan bastady. Jobanyń arqasynda jas jigit Oıyl aýylynda sal aýrýyna shaldyqqan balalardy ońaltýǵa arnalǵan ıppoterapııa ortalyǵyn ashty. Balalardy tegin emdeıdi. Eki at ta aýrýhana mańyna baılanǵan.
«Qazaq jylqyǵa jaqyn ári balalar da atqa mingendi unatady. Búginde ıppoterapııa ortalyǵyna jıyrma erekshe bala baryp júr. Bári tegin em qabyldaıdy», - dedi R.Baqdáýletov. Aýyl turǵyndary 24 jasar jigittiń qaıyrymdy isine razy.
Al Áıteke bı aýdanynyń turǵyny Gúlshat Ábdibekova muqtaj otbasylarǵa kókónis taratady. Eki balanyń anasy jylyjaı bıznesin qolǵa aldy.
«Jylyjaı salý oıy kenetten keldi. Joldasym ekeýmizdiń alǵan arnaıy bilimimiz joq. Іstiń keıbir tustaryn ınternetten qaradyq, keıbirin jany ashıtyn adamdar aıtty. Endi bizdiń aýylda árdaıym jańa pisken pııaz bolady», - dedi ol.
27 jastaǵy aqtóbelik Gúlfaıra Ramazanova arbadaǵy jandardyń ishki qıyndyqtaryn eńserip, súıikti isin bastaýlary qanshalyqty qıyn ekenin jaqsy biledi. Gúlfaıra - bala kúninen múgedek. Ol «Zhas project» jastar jobasyna qatysyp, 1 mıllıon teńge aldy. Fotosýret ónerine oqytyp júr.
«Men ózime uran tastadym da ózimniń kóp nárseni isteı alatynymdy túsindim. Adamdar meniń nemen aınalysatynymdy bilgen kezde olardyń kózderinde burynǵydaı músirkeý emes, tańǵalý-tánti bolý baıqalady», - dedi ol. Fotostýdııadan jıyrmadan astam adam oqýdan ótti. Aqtóbelik qendi ıgi isin jalǵastyrý úshin óz biliktiligin arttyrǵysy keledi.
