Aqtóbelik prokýrorlar shetel asyp ketken alty qylmyskerdi ekstradıtsııalady

AQTÓBE. QazAqparat - Aqtóbe oblystyq prokýratýrasy shet elde qylmys jasap, Qazaqstanǵa tyǵylǵan 8 qylmyskerdi shekara asyrdy. Al oblys aýmaǵynda qylmys jasap, ózge elden pana izdegen 6 qylmysker keri qaıtaryldy. Bul týraly oblys prokýrorynyń aǵa kómekshisi Ahmet Ádilov málim etti, dep habarlaıdy «QazAqparat» tilshisi.

«Qylmyskerler jazadan qutylyp ketýdi oılap, keı kezde el asyp ketedi. Ótken jyly qylmys jasaǵan 8 shetel azamatyn keri qaıtarý týraly ótinish qanaǵattandyryldy. Ózge elden 6 qylmysker Aqtóbege ákelindi. Máselen, Reseı qylmysker A.Hýdındi qaıtardy. Ol ishimdik iship, júrgizýshi kýáliginen aıyrylǵanyna qaramastan kólik júrgizgen. «Samara-Shymkent» tasjolynda qarsy baǵytqa shyǵyp ketip, jeńil kólikpen soqtyǵysady. A.Hýdınniń kóligindegi bir jolaýshy oqıǵa ornynda qaza tapty. Kisi ólimimen aıaqtalǵan jol-kólik oqıǵasynan soń júrgizýshi qashyp ketip, shekara asqan. Halyqaralyq izdeý jarııalanyp, qylmysker kórshi elden tabyldy»,- deıdi oblys prokýrorynyń aǵa kómekshisi Ahmet Ádilov.

A.Hýdın 8 aıdan soń Reseıdiń Tver qalasynda ustalyp, Qazaqstanǵa ekstradıtsııalandy. Sot sheshimimen ol 3 jyl 11 aıǵa bas bostandyǵynan aıyryldy.

Altynaı Saǵyndyqova