Aqtóbelik prokýror dámhanada abaısyzda kisi óltirgenderge jeńil jazany túsindirdi
«Sot Marat Abdýllın men Artýr Bereketovti buzaqylyq, abaısyzda kisi óltirgeni úshin 2 jáne 3 jylǵa bas bostandyqtarynan aıyrý jazasyn taǵaıyndady. Dámhanamen esep aıyryspaı, ketip bara jatqandardy toqtatpaq bolǵan ákimshi Áset Orazbaı júrip bara jatqan kóliktiń esigine jarmasqan. Týǵan-týystarynyń kózqarasyna túsinistikpen qaraımyn. Biraq sot sheshimin jan-jaqty túsindirgim keledi. Eger oqıǵa adam ólimimen aıaqtalsa kisi óltirý nemese abaısyzda kisi óltirý boıynsha aıyptalady. Ekeýiniń is-áreketinde aıyrma bar. Eger adam kisi óltirýdi kózdese jáne óltirýdi jan-jaqty oılastyrsa, onda ol kisi óltirgeni úshin jaýapkershilikke tartylady. Nelikten sottalýshylardyń isi abaısyzda kisi óltirý babymen qaraldy? Kodekste «Menmendikpen nemese nemquraılylyqpen jasalǵan is-áreket "abaısyzda jasalǵan qylmystyq quqyqbuzýshylyq" dep tanylatyny jazylǵan. Eger adam óz áreketteriniń (áreketsizdiginiń) qoǵamǵa qaýipti zardaptar týǵyzý múmkindigin aldyn ala boljap bilgen bolsa, biraq buǵan jetkilikti negizdersiz jeńiltektikpen bul zardaptardy boldyrmaýǵa bolady dep eseptegen bolsa, qylmystyq quqyqbuzýshylyq menmendikpen jasalǵan dep tanylady» dep jazylǵan. Abdýllın men Bereketov dámhana ákimshisi Áset Orazbaıdyń kólikti ustap turǵanyn bile tura, jyldamdyqty asyrǵan kezde ony qalyp qoıady dep oılaǵan. Abaısyzda kisi óltirgenderi úshin sottalýshylardyń ekeýine Kodekste qarastyrylǵan jaza taǵaıyndaldy. Sottalýshylar jábirlenýshini qasaqana óltirdi deýge kelmeıdi»,- dedi Aqtóbe oblystyq prokýratýrasynyń apparat jetekshisi Jasulan Dáýlembaev.
Eske salsaq, dámhanada keshki as iship, ishimdik aldyrtqan Marat Abdýllın men Artýr Bereketov tapsyrys aqysyn tolyq tólemeı, kólikke otyrǵan. Olardyń izinen kólikke umtylǵan Áset Orazbaı birneshe metr júrip, keıin jyldamdyqqa ilese almaı, qulap, oqıǵa ornynda mert boldy. Onyń artynda tórt balasy qaldy. Sot sheshimimen sottalýshy Marat Abdýllın 2 jylǵa, Artýr Bereketov 3 jylǵa bas bostandyqtarynan aıyryldy. Jábirlenýshi tarap sot sheshimimen kelispeı, appelıatsııalyq shaǵym túsirýge daıyndalyp jatyr .