Aqtóbelik polıtseıler júrgizýshilerden kómek surady
AQTÓBE. QazAqparat -Aqtóbe oblystyq ishki ister departamenti Aqtóbeniń Soltústik aınalma jol jáne Aqtóbe -Orynbor tasjolynda qarashylyq shabýyl jasaǵan kúdiktini ustaı almaı otyr. Búgin basshylar júrgizýshilerden kómek surady, dep habarlaıdy QazAqparat tilshisi.
Buǵan deıin habarlaǵanymyzdaı, 6 sáýir kúni Aqtóbe qalasyndaǵy Soltústik aınalma jolda belgisiz bireý «Mersedes Bents» kóligine qaraqshylyq shaýyl jasap, jolaýshynyń 31 myń rýbli men altyn saqınalaryn alyp ketken bolatyn. Al, 19 sáýir kúni KamAZ kóligine qaraqshylyq shabýyl jasalyp, 52 jastaǵy Valerıı Morozov oqıǵa ornynda kóz jumǵan. Belgili bolǵany, onyń aqshasy men júrgizýshi kýáligin alyp ketken. Búgin Aqtóbe oblystyq ІІD basqarma bastyqtary júrgizýshilerden kómek surady.
«Áleýmettik jelide Aqtóbe oblysy aýmaǵyndaǵy jol boıynda qaýipti degen aqparat tarap jatyr. Biraq bul jalǵan aqparat. Oqıǵanyń biri 6 sáýirde, ekinshisi 19 sáýirde boldy. Birinshisinde Qylmystyq kodekstiń «Qaraqshylyq shabýyl», ekinshisinde «Kisi óltirý» baby boıynsha is qozǵaldy. Júrgizýshi basynan atqan oqtan kóz jumǵan. Qazirgi kezde birneshe sot-medıtsınalyq saraptama taǵaıyndaldy. Tergeý júrip jatyr. Aqtóbe oblysy aýmaǵyndaǵy joldarda jumys kúsheıtildi. Oqıǵa bolǵan kúni sol jolmen júrgen júrgizýshiler beıneregıstratorlaryn qarasa deımiz. Biz shekara qyzmetine de habarlap, Qazaqstan, Reseı jáne ózge el azamattarynyń kólik kóp júretin jolda bolǵanyn bildik. Olar da bizge kómektese alady. Qupııa aqparat bergen adam týraly málimetter de qupııa saqtalyp, qaýipsizdik qamtamasyz etiledi»,- dedi Aqtóbe oblystyq ІІD basqarma bastyǵy Arman Muhamedııarov.
Polıtsııa qyzmetkerleri baspasóz máslıhaty kezinde eki oqıǵanyń bir-birine baılanysy bar-joǵyn tergeýge baılanysty jarııalamady.
«Aqtóbe oblysy boıynsha 10 myńnan astam qarý tirkelgen. Qazirgi kezde respýblıkalyq «Qarý» aldyn alý sharasy ótip jatyr. Ári reıd, tekserý bastaldy. Qarý ustaıtyn adamdardy mekenjaıy boıynsha tekserip, sońǵy bes jylda joǵalǵan, urlanǵan qarýdy da qarap jatyrmyz. Buryn qaraqshylyq shabýyl jasaǵan adamdar da tekserýge alyndy. 2017 jyly bostandyqqa shyqqandardy da qaraımyz. Qylmysty ashý úshin osyndaı jan-jaqty jumys júrgizilýde,- dedi Aqtóbe oblystyq ІІD basqarma bastyǵy Arman Muhamedııarov.
Aıta keteıik, qazirgi kezde eki qylmystyq iske baılanysty kúdiktiler ustalǵan joq.
