Aqtóbelik polıtseıler talmasy ustaǵan júrgizýshiniń ómirin saqtap qaldy
AQTÓBE. QazAqparat – Aqtóbe qalasynyń turǵyny óz kóliginde talmasy ustap, eshkimdi kómekke shaqyryp úlgermegen. Oǵan kóshe qaýipsizdigin baqylap júrgen polıtsııa qyzmetkerleri járdem berdi, dep habarlaıdy QazAqparat tilshisi.
Oblystyq polıtsııa departamentiniń krımınaldyq polıtsııa qyzmeti qaladaǵy Sáńkibaı batyr kóshesinde «Nıva» kóliginiń burylysta turǵanyn kórdi.
«Kólikke jaqyn kelip, qaraǵanda júrgizýshiniń bet álpeti kógerip ketkenin, talma aýrýy ustaǵanyn biledi. Sóıtip qolda bar kiltti alyp, qarysyp qalǵan jaǵyn ashyp, tilin basady. Alǵashqy medıtsınalyq kómek kórsetilgen soń jedel járdem de jetti. Esin jıǵan júrgizýshi vahtalyq ádispen jumys istep, sharshap kele jatqanyn aıtty. Polıtsııa qyzmetkerleri júrgizýshini medıtsına qyzmetkerlerine tapsyryp, kólikti avtoturaqqa qoıý úshin onyń dostaryna berdi», - dep habarlady oblystyq PD baspasóz qyzmeti.
Polıtsııa departamenti júrgizýshige kómek kórsetken eki polıtsııa qyzmetkeriniń aty-jónin jasyryn ustaýdy jón kórip otyr. Sebebi ekeýi de jedel jasaqtyń qyzmetkeri.
