Aqtóbelik polıtseıler kıiz úı tigip, jetim balalardy qonaq etti
Polıtsııa qyzmetkerleri aǵash úı tigip, ulttyq sport túrlerinen jarys ótkizdi. Al ata-ana qamqorlyǵynsyz qalǵan balalar óz qoldarymen jasaǵan buıymdardy kórme-jármeńkege alyp keldi, dep habarlaıdy QazAqparat tilshisi.
«Balalar úıiniń tárbıelenýshilerin shaqyryp, olarǵa mereke syılaýdy jón sanadyq. Ata-anasynan aıyrylǵan, kóńili jabyrqaýly, erteńgi kúnine alańdaýly balalar úshin bul jaqsy syı boldy. Olar bizge qur qol kelmegen. Bári óz qolymen jasap, tigip, toqyǵan buıymdaryn ákeldi. Kórme-jármeńke uıymdastyrylyp, qaǵaz, matadan jasalǵan buıymdardy polıtsııa qyzmetkerleri satyp aldy. Keıin biz balalarǵa estelik syılyq tabys ettik. Memleket qamqorlyǵyndaǵy mektep oqýshylary polıtsııa qyzmetkerlerin kórip, olardyń ómirimen, jumysymen tanysty. Bálkim, olar osy kezdesýden soń quqyq qorǵaý salasyn tańdap, jaqsy maman ıesi atanatyn bolar. Bári de el tynyshtyǵy men bolashaǵy úshin jasalyp jatqan ıgi shara»,- dedi oblystyq Іshki ister departamentiniń baspasóz hatshysy Nurgúl Qonaqbaeva.
Polıtsııa qyzmetkerleri balalar úıiniń tárbıelenýshilerine dastarhan jaıyp, qazaqtyń ulttyq taǵamdaryn usyndy. Sporttyq jarystardyń jeńimpazdary dıplomdarmen jáne gramotalarmen marapattaldy.
«Oblystyq Іshki ister departamentiniń jeke quramy balalar úıiniń tárbıelenýshilerin birinshi ret merekege shaqyryp, oqýshylarǵa jaqsy kóńil-kúı syılady. Balalar bul kúnge aldyn ala daıyndaldy. Ónerpazdarymyz bı bılep, án aıtty. Barlyǵy 30 bala bir kún boıy polıtsııa qyzmetkerlerimen birge sporttyq jarystarǵa qatysty. Bári syılyq alyp keldi. Jaqsy ásermen oralǵan balalar oqýǵa qaıta kiristi»,- dedi Alǵa balalar úıiniń dırektory Kenjeǵazy Balǵazın.
