Aqtóbelik polıtseıler balkonnan sekirmek bolǵan er adamdy qutqardy
AQTÓBE. QazAqparat - Aqtóbede oblysynyń PD patrýldik jasaqtary 41 jastaǵy er adamnyń óz-ózine qol jumsaý áreketiniń aldyn aldy, dep habarlaıdy Polisia.kz.
29 sáýirde saǵat 16:43-te «102» pýltine Bilge qaǵan kóshesindegi úıdiń turǵyndary tórtinshi qabattyń balkonynan er adam sekirip ketpekshi bolyp turǵany jóninde qońyraý shalǵan. Aqtóbe oblysy PD jedel basqarý ortalyǵynyń qyzmetkerleri osy aýdanda bolǵan patrýldik jasaqqa habar berdi.
Oqıǵa ornyna shuǵyl jetken eki patrýl jasaǵynyń biri turǵyn úıge kelgen boıda tórtinshi qabatqa kóterilip, er adam turǵan páterge kirýge tyrysty, biraq eshkim esikti ashpady.
Ekinshi top tómengi jaqta, syrtta turyp, balkondaǵy er adamnyń is-áreketin qadaǵalaǵan. Tártip saqshylary kórshi páterden balkon arqyly kirýshe sheshim qabyldady. Osylaısha Aqtóbe qalasynyń aýmaqtyq qorǵanys áskerı mindettileri Saǵynbaev pen Qalybekov sýıtsıdtiń aldyn alyp,er adamdy qutqaryp qaldy.
Ol oblystyq narkologııalyq dıspanserge alǵashqy kómek kórsetý úshin jetkizildi.
