Aqtóbelik polıtseı júrgizýshi kýáligin alatyndardyń emtıhanyn ózi tapsyryp kelgen
AQTÓBE. QazAqparat - Aqtóbelik polıtseı Nurdáýlet Sarshın qyzmettik ókilettiligin asyra paıdalanyp, júrgizýshi kýáligin almaq bolǵan adamdardyń ornyna emtıhan tapsyryp kelgen, dep habarlaıdy QazAqparat tilshisi.
Aqtóbe oblysy, Muǵaljar aýdandyq soty Ákimshilik polıtsııa bólimi, tirkeý-emtıhan alý tobynyń aǵa memlekettik kólik ınspektory Nurdáýlet Sarshınge qatysty qylmystyq isti qarady.
Іs materıalyna súıensek, polıtsııa kapıtany qyzmettik ókilettiligin asyra paıdalanyp, 2017 jyldyń jeltoqsany men 2018 jyldyń qańtary aralyǵynda birneshe adamnyń ornyna «emtıhan» tapsyrǵan. Máselen, 2017 jyldyń qarasha aıynda buryn 9 aıǵa júrgizýshi kýáliginen aıyrylǵan B.Baıǵaraev tanysy K.Rahımovqa, ol tanysy Ashyqbaevqa aqsha berip, keıin sońǵysy 20 myń teńge men qujattardy polıtsııa qyzmetkerine beredi. Keıin aıyptalýshy A.Sarshın barlyǵy 40 suraqtyń 36-na durys jaýap berip, emtıhannan ótedi. «Emtıhannan ótti» degen qujatty alyp, qol qoıyp, ıesine qaıtarady. Keıin osy jolmen N.Nurbaev, E.Áýezov, O.Zamıraılo, E.Qarashaev, J.Jamanov, M.Baımurzın, D.Esjanov, B.Tileýbaev, K.Satybaldın, D.Janádilov men V.Gelvıhke qujat jasap berdi. Biraq Muǵaljar aýdandyq ishki ister bóliminde júrgizýshi kýáligin alatyn adamdardyń emtıhan paraqshasy men teorııalyq emtıhan tapsyrǵany týraly eshqandaı qujat tirkelmegen. Qylmystyqtyq isti qaraý kezinde aıyptalýshy Nurdáýlet Sarshın protsessýaldy kelisimge kelip, ózine taǵylǵan aıypty moıyndady.
Muǵaljar aýdandyq soty aıyptalýshy Nurdáýlet Sarshındi Qylmystyq kodekstiń «Laýazymdyq ókilettilikterdi teris paıdalaný», «Qyzmettik jalǵandyq jasaý» baptary boıynsha aıypty dep tanyp, eki jylǵa bas bostandyǵynan shekteý jazasyn taǵaıyndady. Ol ómir boıy memlekettik jáne quqyq qorǵaý salasynda jumys isteı almaıdy. Sonymen qatar, polıtsııa kapıtany sheninen aıyryldy.
