Aqtóbelik polıtseı 50 myń teńge para alyp, 2,5 mıllıon teńge aıyppul arqalady
AQTÓBE. QazAqparat - Aqtóbede polıtsııa qyzmetkeri Aıbek Tashpenov 50 myń teńge para alyp, 2,5 mıllıon teńge aıyppul tóleıtin boldy. Sot ony ómir boıy quqyq qorǵaý salasynda eńbek etý múmkindiginen aıyryp, múlkin tárkileý týraly úkim shyǵardy, dep habarlaıdy QazAqparat tilshisi.
Qyzmet babynda júrip kólik basqarý erejesin buzǵan adamdarǵa aıyppul salmaı, para alǵan Aıbek Tashpenov 2,5 mıllıon teńge aıyppul tóleıdi. Ol Qylmystyq kodekstiń «Para alý» baby boıynsha aıypty dep tanyldy.
«Sottalýshymen jasalǵan qylmys aýyrlyǵy ortasha qylmysqa jatady. Sot jaza taǵaıyndaý kezinde sottalýshynyń qylmystyq jaýaptylyǵyn jáne jazasyn jeńildetetin mán-jaılar retinde buryn qylmystyq jaýapqa tartylmaǵanyn, aıypty moıyndap, shyn júrekten ókinýin, jaǵymdy minezdemesin, zalal ornyn toltyrǵanyn, kámiletke tolmaǵan balalary bar ekenin eskerdi. Aqtóbe qalalyq №2 sotynyń úkimimen sottalýshynyń múlki tárkilenip, quqyq qorǵaý organdarynda qyzmetpen aınalysý quqyǵynan, polıtsııa starshınasy sheninen ómir boıyna aıyryldy»,- dedi oblystyq sottyń baspasóz hatshysy Ilıada Dosova.
Eske salsaq, Aıbek Tashpenov Aqtóbedegi ákimshilik polıtsııa basqarmasynda jumys istegen. Ol osy jyldyń 18 aqpannan 19 aqpanǵa qaraǵan túni Aqjar-2 aýylynda kúdikti kóringen kólikti toqtatady. Sebebi, júrgizýshi qujatsyz, kóliktiń jaryǵyn jaqpastan aýyl ishinde júrgen. Polıtsııa qyzmetkeri júrgizýshige ákimshilik hattama toltyrmaı, para alǵan. Aıbek Tashpenov sózinde para alǵanyn tolyq moıyndap, sottan jeńil jańa taǵaıyndaýdy surady. Budan buryn habarlaǵanymyzdaı, ol jasaǵan isine ókinip, keshirim surady. https://kaz.inform.kz/news/aktobede-50-myn-tenge-para-algan-policiya-kyzmetkeri-kinasin-tolyk-moyyndady_a3008215
