Aqtóbelik pedagog jylyjaı sharýashylyǵyn ınternet arqyly meńgerip aldy

AQTÓBE. QazAqparat - Aqtóbe qalasy mańyndaǵy Sazdy aýyldyq okrýginde turatyn Qalamqas Eseneeva jylyjaı sharýashylyǵyn 1 jyl ishinde meńgerip aldy. Memlekettik baǵdarlama arqyly 3 mıllıon teńge nesıe alǵan pedagog alǵashqy ónimderin satýǵa shyǵardy, dep habarlaıdy QazAqparat tilshisi.

Aqtóbelik kásipker Qalamqas Eseneeva ótken jyly «Jumyspen qamtýdyń 2020 jol kartasy» baǵdarlama aıasynda 6 paıyzdyq ústemeaqymen 3 mıllıon teńge nesıe alǵan. Nesıe rásimdeý erejesi boıynsha, oǵan nesıeni tóleý merzimi bir jylǵa shegerilip, qarjyny qaıtarý kestesi bıyl berilgen. ıAǵnı Qalamqas Eseneeva tóleý kestesin ózi belgiledi.

«Ótken jyly jylyjaı qurylysy júrgizildi. Bıyl sáýir aıynda tuqym egip, eki aıdan soń ónim berile bastady. Qııar egýdi buryn bilmedik. Bárin ǵalamtordan qarap, óz kúshimizben úırenip aldyq. Jylyjaı aýmaǵy - 260 sharshy metr, qurylysy polıkarbonattan jasalǵan. Qysta da qııar ósirý úshin jylý júıesin júrgizgen bolatynbyz. Biraq júıede qatelik bar, qurylysty qaıta jańartý qajet.

Kúzde taǵy tuqym sebemiz. Kásip ashý kúıeýimniń armany edi. Men ózim pedagogpyn, 4 balamyz bar. Endi bar zeıindi jylyjaı sharýashylyǵyna aýdaramyz. Ózim jylyjaıǵa teńerteń kirip, keshke shyǵamyn. Qııar baptaý da ońaı emes. Otbasylyq bıznesti ári qaraı damytyp, sharýashylyqty keńeıtý jospary bar. Adamnyń qolynan kelmeıtin is joq ári ınternet jaqsy kómekshi»,- dedi Qalamqas Eseneeva.