Aqtóbelik palýandar Qajymuqannyń áıgili ónerin qaıtalady
AQTÓBE. QazAqparat – Aqtóbede «Batyrs' Battle» jarysy ótip, palýandar Qajymuqannyń áıgili ónerin qaıtalady, dep habarlaıdy QazAqparat tilshisi Qazaqstan sportshylar odaǵyna silteme jasap.
Saıys kezinde alyp kúsh ıeleri qap, bórene, alyp tas kóterip, beldesti, armatýra maıystyrdy. Barlyǵy 8 palýan baq synady. Joba avtory, belgili atlet, QR mádenıet jáne sport mınıstrliginiń ambassadory Sergeı Tsyrýlnıkovtiń aıtýynsha, bir kezderi Qajymuqan Muńaıtpasuly dál osy synaqtan ótken.
Tartysqa toly saıystan keıin «Batyrs' Battle» jeńimpaz beldigin gir kóterý sportynan álem chempıonatynyń júldegeri, masrestlıng boıynsha Azııa chempıonatynyń qola júldegeri Sergeı Goncharov ıelendi. Saıystyń ózge qatysýshylaryna medal men alǵys hattar taratyldy. Dmıtrıı Emelıanov ekinshi, Tólegen Áljanov úshinshi oryndy ıelendi.
«Sportshylar odaǵynyń atynan jeńispen quttyqtaımyn. Kópshiligi óńirde mundaı batyrlardyń bar ekenin bilmegen bolar. «Qazaqstandyq sportshylar odaǵy» respýblıkalyq qoǵamdyq birlestigi aldaǵy ýaqatta da dál osyndaı jarystyń aımaqta uıymdastyrylatynyna senim bildiremiz»- dedi Qazaqstandyq sportshylar odaǵynyń tóraǵasy Azamat Qarlyǵashev.
Ol sharaǵa qatysqan ataqty ziltemirshi Ilıa Ilın, Evgenıı Goncharov, Galıb Djafarovqa, týrızm men sportty qoldaý qory «Sport Qory» men QR Mádenıet jáne sport mınıstrligine, Aqtóbe oblystyq, qalalyq ákimshilikke qoldaýy úshin alǵys bildirdi. Sportshylar odaǵynyń qurmetti múshesi Ilıa Ilın barlyq qatysýshyny quttyqtady.
«Kúsh sportyn damytatyn mundaı saıystardy uıymdastyrýdy toqtatpaý kerek. Keremet! Bizde talantty sportshylar óte kóp»- dedi Ilıa Ilın.
