Aqtóbelik ózge ult ókilderi Qazaqstanǵa jáne onyń halqyna alǵystaryn bildirdi
AQTÓBE. QazAqparat - Aqtóbede turatyn ózge ult ókilderi Alǵys aıtý kúninde rızashylyqtaryn bildirdi.
«Ortaq taǵdyr! Berekeli birlik! Sheksiz alǵys!» atty merekelik sharaǵa júzden astam adam qatysty, dep habarlaıdy QazAqparat tilshisi.
Aqtóbedegi Qazaqstan halqy Assambleıasy ǵımaratynda 18 etnomádenı ortalyq bar. Árqaısysy óz tili men ónerin, mádenıetin damytý jolynda jumys istep jatyr. Óńirde bolatyn mádenı-tanymdyq keshterge úzbeı qatysatyn birlestik ókilderi búgin «Ortaq taǵdyr! Berekeli birlik! Sheksiz alǵys!» atty merekelik shara ótkizdi. 
Oǵan oblys ákimi Berdibek Saparbaev, qala ákimi Іlııas Ispanov pen Qazaqstanǵa, sonyń ishinde Aqtóbege qonys aýdarǵan túrli ult ókilderi qatysty.
«Men 1969 jyly Aqtóbege qonys aýdardym. Bul jerdegi halyq meni qushaq jaıa qarsy alyp, bar táttisin tosty. Bul tarıh. 30-40 jyldary qazaq jerine qonys aýdarǵandar kóp boldy. Onyń ishinde ázerbaıjandar da bar. Ondaǵan myń ázerbaıjandyq bala-shaǵasymen týǵan jerinen qýylyp, qazaq jerine keldi. Bul kezde qazaq halqynyń basynan qıyn kúnder ótip jatqan bolatyn. Asharshylyq, qýǵyn-súrgin men soǵysty bastan ótkerdi. Biraq olar bizdi qabaq shytpaı qarsy alyp, baýyryna basty. Osy úshin myń alǵys aıtamyz. Men óz Otanyma, elime, halqyma alǵysymdy bildirip, bas ıemin»,- dedi «Ázerbaıjan qaýymdastyǵy» respýblıkalyq qoǵamdyq birlestiginiń Aqtóbedegi bólimshesiniń tóraǵasy Shahbaz Jamalov.
Aıta keteıik, Aqtóbedegi barlyq etno-mádenı birlestiktiń jeksenbilik mektebi bar. Munda kelýshiler memlekettik ana tilin úırenip, vokal, bı úıirmelerine qatysady. Merekelik shara aıasynda «Qazaqstanǵa jol» atty tarıhı kórme uıymdastyryldy. Ár ulttyń tarıhy men tynys-tirshiliginen syr shertetin buıymdar men basylymdar qoıyldy.
