Aqtóbelik otbasy sý tasqynyna baılanysty berilgen 70 myń teńgeden bas tartty
AQTÓBE. QazAqparat - Aqtóbedegi sý tasqyny kezinde turmystyq tehnıkasy men múlki jaramsyz kúıge túsken Shynbolatovtar otbasyna shyǵyn retinde 70 myń teńge esepteldi. Kıim-keshek pen dúnıe-múliksiz qalǵan otbasy ákimdik usynǵan aqshadan bas tartyp otyr, dep habarlaıdy QazAqparat tilshisi.
Aqtóbede sý tasqynynyń shyǵynyn esepteý jumysy áli júrip jatyr. Al turǵyndar úıin sý basqan kezde túsirgen sýretterin baspadan shyǵaryp, ákimdiktegi komıssııaǵa tapsyrýdy ádetke aınaldyrǵan. Aqtóbe qalasyndaǵy Zarechnyı-2 aýyly mańyndaǵy saıajaıda turatyn Aızat Amanova 70 myń teńgeden bas tartyp, qurylysqa qajetti jer surap otyr. Onyń aıtýynsha, irgetasy syr bergen úıi qulap qalýy múmkin eken.
«Úıimiz sýǵa ketken kezde teledıdar, tońazytqysh, kir jýý mashınasy sekildi barlyq tehnıkamyz jaramsyz bolyp qaldy. Úıdiń irgetasyna da zaqym kelgen. Komıssııa kelip, bir bólmeniń edenin qalpyna keltirýge kómektemesiz dedi. Bizge bólingeni 70 myń teńge. Ony almadym. Jaz aıy kele jatyr. Tońazytqyshymyz qajet. Onyń shyǵynyn kim óteıdi? Ári bir bólmeniń emes, úıimniń edenin qaıta aýystyrý kerek. Shyǵyndy 200 myń dep otyrmyn»,- dedi Ertaı Shynbolatov.
Aqtóbe qalasy, Qarǵaly aýyldyq okrýgindegi ózender mańynda barlyǵy 119 úıdi sý basqan. Qazirgi ýaqytta bir bóligin saıajaıdan kóshirip, olarǵa jer berý máselesi qarastyrylyp jatyr.
«Úılerdi qarap, komıssııa tizim jasady. Qazir 119 úıdiń 40-tan astamy «Qolǵanat Aqtóbe» qorynan aqsha alý úshin qujattaryn komıssııa qaraýyna jiberip, usynys maquldandy. Olar 30 myń teńgeden bastalatyn shaǵyn qarjy aldy. Jóndeý jumystaryn ózderi júrgizedi. Máselen, bir turǵynǵa 30 myń teńge berildi. Úıindegi peshin qalpyna keltirip jatyr. Al baspanasy kóp mólsherde zardap shekkender baǵalaýshylardy kútip otyr. Taıaýda shyǵyn eseptelýi tıis», - dedi Aqtóbe qalasyndaǵy Qarǵaly aýyldyq okrýginiń ákimi Almaz Álimbaev.
Aıta keteıik, Aqtóbedegi sý tasqyny kezinde zardap shekkenderdiń keıbiri shyǵyndy ózderi eseptep, ákimdikten naqty somasyn surap jatyr. Aldaǵy ýaqytta qalalyq ákimdik pen jeke kompanııalar, ıaǵnı, baǵalaýshylar arasynda kelisim shart jasalyp, naqty shyǵyn quny anyqtalady eken. Baǵalaýshylardyń jumysyn ákimdik ótep bermek.
