Aqtóbelik órt sóndirýshiler Reseıge kómekke attandy
AQTÓBE. QazAqparat - Aqtóbelik órt sóndirýshiler Reseıdiń Orynbor oblysyna attandy. Janǵan qurǵaq shópti sóndirýge 50-ge jýyq qyzmetker men 6 tehnıka jiberildi, dep habarlaıdy QazAqparat tilshisi.
Reseıdiń Orynbor oblysyndaǵy órt sóndirýshiler aqtóbelik áriptesterinen kómek surady.
"Aqtóbe oblystyq tótenshe jaǵdaılar departamentine saǵat 16.40-ta Orynbor oblysynda qurǵaq shóptiń janyp jatqany jáne jaqyn aımaqtardaǵy eldi mekenderge qaýip tóngeni, osy oraıda órtti sóndirý úshin qosymsha kúsh pen qural qajet ekeni týraly aqparat kelip tústi. Al 18.30-da Aqtóbe oblysynda jedel shtab jumysyn bastady. Departament basshylyǵy QR ІІM TJK Aqtóbe oblysy Tótenshe jaǵdaılar departamenti men RF TJM Orynbor oblysy boıynsha basqarmasy arasyndaǵy ózara kómek kórsetý josparyn oryndaý maqsatynda órtke qarsy qyzmet kúshi men qurylymynan 36 adam men 5 tehnıka jiberdi. Onyń ishinde, Qarǵaly aýdany erikti órtke qarsy qurylym jasaǵynan 10 adam men 1 dana tehnıkany attandyrdy",- dep habarlady oblystyq TJD baspasóz qyzmeti.
