Aqtóbelik órt sóndirýshiler kópqabatty úıdiń qasbetindegi tez janatyn materıaldy alyp tastaýdy surady
AQTÓBE. QazAqparat - Aqtóbede úıdiń qasbetindegi ásemdik úshin paıdalanylǵan qurylys materıaly turǵyndardyń ómirine qaýip tóndirip tur. Tótenshe jaǵdaılar qyzmeti jergilikti ákimdikten tez janatyn materıaldy alyp tastaýdy surady, dep habarlaıdy QazAqparat tilshisi.
Aqtóbede 9 qabatty úıdiń balkony órtenip, 50 adam qaýipsiz jerge shyǵaryldy. Ótken jyldyń qazanynda dál osy úıdiń qasbeti janyp, birneshe páter zaqymdanǵan bolatyn. Kezekti órt kezinde tótenshe jaǵdaılar qyzmeti jergilikti ákimdikten shuǵyl sheshim qabyldaýyn surady.
«Aqtóbe qalasy boıynsha qasbeti tez janatyn qurylys materıalymen qaptalǵan 13 kópqabatty úı bar. Biz jergilikti ákimdikke habar berip, bárin aýystyrýdy suradyq. Qazir jumys atqarylyp jatyr. Aqtóbe oblysynyń ákimdigi qala ákimdigine tapsyrma berdi. Bárin almastyrýy múmkin», - dedi Aqtóbe oblystyq tótenshe jaǵdaılar departamentiniń bastyǵy Baýyrjan Syzdyqov.
Aıta keteıik, turǵyndar da tez tutanyp, janatyn qurylys materıalyn múlde alyp tastaýdy surap otyr.
«Turǵyndar keıde temeki tuqylyn tastaıdy. Sol kezde de osyndaı órt shyǵýy múmkin. Bizge ásemdik emes, qaýipsizdik qajet. Alǵash ret órt bolǵan kezde-aq alyp tastaýdy suradyq, biraq nátıje shyqpaı tur», - dedi PIK tóraıymy Tatıana Grechko.
Búgin osy oqıǵaǵa qatysty oblys ákimdiginde shuǵyl jıyn boldy. Oblys ákiminiń baspasóz qyzmetiniń habarlaýynsha, óńir basshysy Ońdasyn Orazalın turǵyn úılerdiń qasbetin zamanýı qurylys materıalyna almastyrýǵa tapsyrma berdi.
