Aqtóbelik ónertapqysh akkýmýlıatordan qýat alatyn qarmaq oılap tapty
aqtYrǵyz aýdanynyń týmasy Jaǵypar Qadirov buǵan deıin shaǵyn traktor qurastyryp shyǵarǵan. Qazir kólik óz qajettiligine jarap tur. Shóp shabady, tasıdy, qar da arshýǵa bolady. Al taıaýda akkýmýlıatordan qýat alatyn qarmaq oılap tapty. Jańa qurylǵyny jasap shyǵý úshin 10 kún ǵana jetkilikti bolǵan.
«Qarmaqqa kóp nárseniń qajeti joq. Bireýine kóliktiń terezesine sý shashatyn dımano qoldanyldy. Ekinshisi vakýmnen daıyndaldy. Ol kóliktiń esiginde bolady. Esik jabylǵanda qulyptalyp qalsa, munda oǵan rele ornattym. Ekeýi de balyqty jaqsy aýlaıdy. Ózimiz qoldanyp ta kórdik», - dedi ónertapqysh Jaǵypar Qadirov.
Yrǵyz aýdanynyń týmasy buryn nan zaýytynda mehanık, elektrık boldy. Arnaıy oqý ornynda bilim almasa da jastaıynan tehnıkaǵa áýes Jaǵypar Qadirov mototsıklge qozǵaltqysh ornatqan. Keıin polıtsııa qyzmetkerleri eskertý berip, qylmystyq jazaǵa tartylatynyn aıtqan. Aıyppul tólep qutylǵan soń ózge dúnıelerdi oılap tapty. Olardyń arasynda et tartqysh qurylǵysy da bar.
«Halyqaralyq áıelder kúnine arnap et tartqysh jasap jatyrmyn. Áıelime syılaımyn. Buǵan deıin aýdandaǵy kásipker tapsyrys berip, jasadym. Dybysy joq, aıaq astynan janyp ta ketpeıdi. Qýattylyǵy kúshti. Ózim jasap shyǵarǵan usaq-túıek dúnıe kóp. Endi qysta júretin kólik jasaǵym keledi. Qazirgi kezde qajetti qural-jabdyqty jınap jatyrmyn. Ózimde kólikke tehnıkalyq qyzmet kórsetý ortalyǵy bar. Jóndeımiz, kólikti boıap beremiz. Jóndeý júrgizýi úshin aýdannan ǵana emes, qaladan da keledi. Ári Yrǵyz Samara-Shymkent tasjolynda ornalasqan. Osy jumystar kezinde jańa dúnıelerge ýaqyt tabý qıyn. Degenmen temir joný qoldan kelgen soń qurylǵy jasaý, oılap tabý qıyn emes», - dedi ol.
Jaǵypar Qadirov tórt balanyń ákesi. Úsh ul, bir qyzy bar. Bul salanyń ózi adam talǵaıtynyn jasyrmaıdy.
«Tehnıkanyń tilin kez kelgen adam uǵa bermeıdi. Mektep balalary da kelip, jumysymmen tanysyp ketedi. Yntasy bary az, sırek kezdesedi. Úırenem dep keletinder keıde bir aıdan soń ketip qalady. Janymda júrgen balalarymnyń óz mashınasy bar. Al ózimniń kóligime bıyl 45 jyl toldy. Qańqasy LýAZ, ishki qural-jabdyǵy ózgergen. Kóbi qoldan jasaldy, kóp buzylmaıdy. Buryn ań aılaýǵa shyqqanda aıdadym. Qazir de sharýashylyqqa jarap tur», - dedi Jaǵypar Qadirov.
Foto: ónertapqyshtyń jeke muraǵatynan
