Aqtóbelik ónerpazdar medıtsına qyzmetkerlerine rızashylyǵyn bildirdi

AQTÓBE. QazAqparat – Halyq shyǵarmashylyǵy ortalyǵynyń ónerpazdary indet kezinde naýqastarǵa em júrgizgen medıtsına qyzmetkerlerine alǵys aıtty, dep habarlaıdy QazAqparat tilshisi.

Oblystyq halyq shyǵarmashylyǵy ortalyǵy koronavırýs ınfektsııasyna qarsy kúres kezinde myńdaǵan adamdy ólimnen arashalap qalǵan aq halattylarǵa arnap «Sheksiz alǵys» kontsertin ótkizdi.

Jas aıtyskerler mektebiniń jetekshisi Marat Ahmetov arnaý aıtyp, «Shashý» halyqtyq otbasylyq ansambli, «Ádep» halyqtyq toby, «Jazıra» halyqtyq ansambli, halyqaralyq jáne respýblıkalyq baıqaýlardyń laýreattary Baǵdat Balmaǵambetova, Nurgúl Ramazanova men jas qobyzshylar ansambli halyq ánderin aıtyp, kúı tartty.

Sharaǵa «Shaǵala» oblystyq balalar ókpe-súıek týberkýleziniń sanatorııi men oblystyq týberkýlezge qarsy dıspanseriniń qyzmetkerleri shaqyryldy.

«Adamnyń eń basty qundylyǵy - ómiri men densaýlyǵy kúzetinde júrgen medıtsına qyzmetkerlerine alǵysymyzdy bildiremiz. Sizder indet taraǵan ýaqyttan beri kún demeı, tún demeı otbasynan jyraqta, naýqastardyń janynda júrsizder. Sondyqtan el bolyp, kómek kórsetý, alǵys aıtý bizdiń azamattyq paryzymyzǵa aınaldy. «Alǵys alǵan arymas» degendeı, árqashan aq halattylarǵa degen qurmetimiz bıik bolsyn», - dedi oblystyq halyq shyǵarmashylyǵy ortalyǵy dırektorynyń orynbasary Gúlnar Seıtalına.