Aqtóbelik oqýshynyń ólimi: Іs qatań baqylaýǵa alynǵan
AQTÓBE. QazAqparat - Aqtóbe oblysynda pyshaq jaraqatynan kóz jumǵan oqýshy isin tergeý jumystary júrip jatyr, dep habarlaıdy QazAqparat tilshisi.
Bul týraly Aqtóbe oblystyq polıtsııa departamentiniń bastyǵy Mahambet Abısatovtyń halyq aldynda esep berýi kezinde belgili boldy.
Kezdesýde Shalqar aýdanyndaǵy oqýshy ólimine, tergeýge qatysty suraq qoıyldy.
«Shalqar aýdanynda toptyq tóbeles bolyp, inimiz Mırasbek Dáýletııar kóz jumdy. Sol is durys tergelip jatqan joq dep esepteımiz. Sebebi, toptyq tóbeles boldy, al tergeýde bul eki adam arasyndaǵy janjal bolyp shyqty. Kúdikti pen jábirlenýshi ǵana bar, ózgeleri kýáger. Biz sol jerde bolǵan adamdardyń bárin qylmystyq jaýapkershilikke tartylǵanyn qalaımyz. Kúdikti jazasynan qutylyp keteýi de múmkin. Sebebi, Qylmystyq kodekstiń 99-babymen is qozǵalǵanymen, sot-psıhologııalyq saraptama qorytyndysy boıynsha «fızıologııalyq affekt kúıinde boldy» dep sheshim shyǵardy. Eger bul anyqtalsa, ózge bapqa aýystyrylýy yqtımal», - dedi kóz jumǵan oqýshynyń týysy Asqar Orazalın.
Aqtóbe oblystyq polıtsııa departamentiniń bastyǵy tergeý jumystary áli aıaqtalmaǵanyn, kúdikti qamaýda otyrǵanyn jetkizdi. Sonymen qatar, sot-psıhologııalyq saraptama qaıta taǵaıyndalyp, endi elordalyq mamandarǵa júgingenin aıtty.
«Men bul isti qatań baqylaýyma alamyn», - dedi Mahambet Abısatov.
Aıta keteıik, sot-medıtsınalyq saraptama qorytyndysy boıynsha kesip-tesetin zat qaza bolǵan oqýshy Mırasbek Dáýletııardyń júregine tıgen.
Eske salsaq, 2019 jylǵy 26 qańtarda mektep oqýshysy kóz jumdy. Sol kúni 17 jastaǵy Shalqar aýdanynyń turǵyny ustaldy.
