Aqtóbelik oqýshylardy mektepke daıyndaýǵa 150 mıllıon teńge jumsaldy
«Mektepke jol» respýblıkalyq aktsııasy aıasynda áleýmettik jaǵdaıy tómen otbasy balalaryna kıim men oqý quraldary satyp alyndy. Bıyl aqtóbelikter erekshe belsendi boldy. Máselen, oblystyq Іshki ister departamentiniń jeke quramy 1 kúndik jalaqysyn bólip, 5,5 mıllıon teńgeni jetim balalar men oqýshylarǵa berdi. Sonymen qatar, memlekettik mekemeler men kommýnaldyq kásiporyndardyń úlesi basym.
«Orta eseppen ár balaǵa 7 myń teńge bólinip, kómek berildi. Jyl ótken saıyn aktsııa aıasynda qaıyrymdylyq is jasaıtyn adamdar sany artyp keledi. Keıbir aqtóbelik áleýmettik jeli arqyly habaryn bilip, áleýmettik jaǵdaıy tómen, muqtaj otbasylardyń tizimin surap, arnaıy kómek kórsetti. Máselen, Roman Kıreev úndeý tastap, 1,3 mıllıon teńge jınady. Balalar úshin arnaıy mektep jármeńkesi uıymdastyryldy»,- dedi Aqtóbe oblystyq bilim basqarmasynyń bólim basshysy Nurgúl Bertileýova.
«Mektepke jol» aktsııasynyń qorytyndysy boıynsha Aqtóbe oblysy Almaty, Astana qalalary men Jambyl oblysynan keıingi tórtinshi orynda tur. Aqtóbe oblystyq bilim basqarmasy qaıyrymdylyq aktsııasyn jyl boıy jalǵastyrady. Búgin balalardy mektepke daıyndaý kezinde belsendilik kórsetken oblystyq ІІD, «Transenergo» AQ, «Qyzyl Aı» qoǵamy men kásipker Roman Kıreevke alǵys hat berildi. 