Aqtóbelik oqýshylar jazǵy demalysyn shetelde ótkizdi
Aqtóbe oblysy boıynsha bıyl 118 myń oqýshy jazǵy demalysyn oıdaǵydaı ótkizdi. Olar qala syrtyndaǵy lagerlerde tynyǵyp, mektep janyndaǵy, shatyrly demalys oryndarynda boldy.
«Baqytty bala» jobasy aıasynda 502 daryndy, talantty, úzdik oqýshylar men áleýmettik jaǵdaıy nashar balalar alys jáne jaqyn shetelge, elimizdiń demalys, saýyqtyrý lagerlerine bardy. Máselen, 400 bala Shyǵys Qazaqstan oblysyndaǵy «Daryn» lagerinde, 80 oqýshy Orynbordyń «Solnechnaıa Strana» lagerinde, 5 oqýshy Tatarstandaǵy robototehnıkany tereńdetip meńgertetin «Baıtık» lagerinde boldy. Sonymen qatar, bes oqýshy Qytaıǵa jiberilip, 12 bala «Aqtóbe ÁKK» UK» AQ bastamasymen «Baldáýren» oqý-saýyqtyrý ortalyǵynda tynyqty»,- dep habarlady oblystyq bilim basqarmasynyń baspasóz qyzmeti.
Oqýshylar Qazaqstannyń kıeli jerler geografııasyna engen qasıetti jerlerdi aralady. Barlyǵy 15 myń oqýshy tarıhı-mádenı eskertkishtermen tanysty. Aldaǵy ýaqytta 100 bala Baıqońyr - Tashkent - Samarqand baǵytymen jolǵa shyǵady. Qazirgi ýaqytta «Bóbek» jáne «Baldáýren» respýblıkalyq ortalyqtarynda az qamtylǵan, kópbalaly otbasy balalary men ata-anasynyń qamqorlyǵynsyz qalǵan, daryndy balalardyń demalysy jalǵasyp jatyr.
Jyl boıy úzdiksiz jumys isteıtin lagerlerde 187 bala demaldy. Alǵa aýdanynyń Bestamaq aýylyndaǵy ınklıýzıvti «Kúnshýaq» demalý jáne saýyqtyrý lagerinde alty aýysymda 600 erekshe bala tynyǵatyn bolady.
