Aqtóbelik oqýshylar jarty jylda «sóıleıtin» qolǵap jasap shyǵardy
AQTÓBE. QazAqparat -Aqtóbedegi Nazarbaev zııatkerlik mektebiniń oqýshylary Nurdáýlet Taýmergenov pen Karen Dolmaǵambetov «sóıleıtin» qolǵap oılap tapty. Qazirgi kezde ónertapqyshtar qolǵapty patentteýdi oılastyryp jatyr, dep habarlaıdy QazAqparat tilshisi.
Nazarbaev zııatkerlik mektebiniń oqýshylary hımııa, fızıka pánderinde óz jobalaryn iske asyrý úshin jumys isteıdi. Nurdáýlet Taýmergenov pen Karen Dolmaǵambetov ótken jyly «sóıleıtin» qolǵap jasaýdy jón kórdi. Olar múgedek jandardyń aldynda jıi kezdesetin kedergilerdi joıyp, adamdarmen sóılesýine, qyzmet alý múmkindikterin keńeıtýge kúsh saldy. Qazirgi kezde «sóıleıtin» qolǵaptyń sózdik qorynda 1 myńnan astam sóz bar. «GloveSpeaker» qolǵaby uıaly telefondaǵy arnaıy baǵdarlama arqyly jumys isteıdi.
«Qolǵap mylqaý adamdardyń kómekshi quraly bola alady. Telefondaǵy baǵdarlamany qosyp, keıin bluetooth arqyly on saýsaqtaǵy tetikter sóıleıdi. Biz aldymen kúndelikti ómirde jıi qoldanatyn sózderdi baǵdarlamaǵa engizdik. Negizi qolǵaptaǵy qýat kózi uzaq ýaqytqa jaramdy. Qazirgi kezde tek aǵylshyn tili ǵana baılanys quraly bolyp otyr. Baǵdarlamany jetildirip, adamdar ózine qajetti tildik baılanysty tańdaı alatyn jaǵdaı jasaımyz. Ekranǵa sóz shyǵyp, qolǵap sony oqyp beredi»,- deıdi ónertapqysh Nurdáýlet Taýmergenov.
Múgedekterdiń kómekshi quralyna suranys bolsa, ónertapqyshtar sý ótkizbeıtin, jyldyń ár maýsymyna laıyqty «sóıleıtin» qolǵap jasap shyǵara alady. Ári jańa týyndyny patentteý qajet.
«Sıqyrly qolǵapqa suranys bolady dep esepteımiz. Aldaǵy ýaqytta qolǵapty patenttep, keıin estý qabileti tómen, sańyraýlar qoǵamyna baryp, tanystyrylym jasaımyz»,- dedi Nazarbaev zııatkerlik mektebiniń muǵalimi Jánibek Janqulov.
