Aqtóbelik oqýshylar polıtseılerdiń ómirimen tanysty
AQTÓBE. QazAqparat - Aqtóbede «Men jáne meniń polıtsııam» atty respýblıkalyq aktsııa ótip jatyr. Mektep oqýshylary polıtsııa qyzmetkerleriniń jumysyn qaǵaz betine túsirip, erlikpen qaza tapqandardyń ómirimen tanysty, dep habarlaıdy QazAqparat tilshisi.
Aqtóbe polıtsııasynyń qyzmeti oqýshylarǵa tanystyrylyp jatyr. Mektep oqýshylary Aqtóbe oblystyq ІІD murajaıyna bardy. Mýzeı 1989 jyly jabdyqtalyp, 2004 dyly qaıta jańartý jumystary júrgizildi. Munda polıtsııa qyzmetkerleriniń ár jyldardaǵy kıimderi, qarý-jaraqtyń úlgileri bar. Sonymen qatar, ishki ister organdary qyzmetkerleriniń marapattary saqtaýly. Mýzeıde 2011, 2016 jyldary bolǵan lańkestik oqıǵalar kezinde erlikpen kóz jumǵan polıtsııa qyzmetkerleriniń sýretteri ilýli tur. Aqtóbelik oqýshylar tártipti baqylap, qaýipsizdikti qamtamasyz etetin polıtsııa qyzmetkerleriniń jumysymen tanysyp, qoǵamdyq oryndarda ózin-ózi ustaý, jol erejelerin úırendi.
«Mektep oqýshylary óte belsendi, polıtsııa jumysyna qyzyǵady. Olar «Polıtsııa qyzmetkeri kim?» degen taqyrypta sýret saldy. Balalar oıyn ártúrli jetkizgen. Biri jol erejesine jaýapty dep oıyn bildirdi, ekinshisi bizdiń qorǵanymyz, qaýipsizdikti saqtaýshy retide túsindirdi. Olar bir-birin qaıtalaǵan emes, oılary ushqyr»,- dedi mektep ınspektory Ońaı Myrzabekova.
Aqtóbelik oqýshylar polıtsııany óz qorǵany dep sanaıdy. Mektep balalary olardyń jumysyna qyzyǵady.
«Mektep ınspektorlaryn tanımyz jáne olarmen birge jumys isteımiz. Sondyqtan biz úshin polıtsııa taqyrybynda sýret salý qıynǵa soqqan joq. Tártipti baqylaıtyn, buzyq balalardy jónge salatyn quqyq qorǵaýshylar biz úshin úlgi», - dedi Aqtóbe qalalyq №21 mektep-gımnazııasynyń oqýshysy Dılnaz Nurmuhanbet.
Aıta keteıik, aktsııa aıasynda barlyq aýdan, aýylda kezdesýler men tárbıe saǵattary ótip jatyr.
