Aqtóbelik oqýshylar ózin keleke etken qurdastarynyń ústinen shaǵymdandy
AQTÓBE. QazAqparat - Aqtóbelik oqýshylar «usqynsyz», «semiz» dep mazaq etken qurdastarynyń ústinen shaǵym aıtty, dep habarlaıdy QazAqparat tilshisi.
Aqtóbedegi «Másele joq!» senim telefony qaıta jumysyn bastady. Endi kez kelgen mektep oqýshysy, jasóspirim ózin mazalaǵan suraqtardy psıholog mamandarǵa qoıyp, jaýap alady.
«Telefon shalǵan balalar qurdastarymen, ata-analarymen kelisimge kele almaıdy. Tentek balalarmen til tabysa almaı qınalatyndar da bar. Máselen, 14 jasynda júkti bolǵan qyz bizden kómek surady. Uzaq ýaqyt psıhologtar sóılesip, ata-anasymen tabystyrdy, sýıtsıdtiń aldyn aldy. Mamandar balamen sóılesken kezde ata-anaǵa habarlasyp, qatar keńes beriledi. Kóbine balaǵa aıtpaı, úıdegi eresek adamdarmen tildesemiz»,- dedi oblystyq bilim basqarmasynyń bólim basshysy Nurgúl Bertileýova.
Aıta keteıik, balalar arasynda qurby-qurdastarymen tóbelesip, janjaldasyp qalatyn derekter de kezdesedi. Óz qataryna «kúlki» bolǵan balalar birden psıhologtarǵa habar beredi.
«Balalar bir-birin urady, kóńiline keletin aýyr sózder aıtady. Máselen, jasóspirimder «usqynsyz», «semiz» degen sózderdi kótere almaıdy. Ári balalar da óte dóreki, oıyn ashyq aıtyp, qurdastaryna zııanyn tıgizgenin sezbeı qalady. Biraq erke balalar da kezdesedi. Bizge ákesi gıroskýter alyp bermegen 7 jastaǵy qyz da habarlasty. Bul suraq ta qaralady. Balasyn ýaıymdaǵan ata-ana, baýyryna alańdaǵan aǵa-apasy da kómekke muqtaj»,- dedi psıholog maman Janat Baıshýaqova.
Aqtóbegi senim telefonyna barlyǵy 500-ge jýyq qońyraý tústi. Onyń 39-y qaıta habarlasyp, óz máselesiniń sheshimin habarlady.
