Aqtóbelik oqýshylar orman órtin anyqtaıtyn qurylǵyny menshiktep aldy
AQTÓBE. QazAqparat - Aqtóbe qalasyndaǵy Nazarbaev zııatkerlik mektebiniń oqýshylary orman, dala órtterin anyqtaýǵa jáne aldyn alýǵa arnalǵan qurylǵy oılap tarty, dep habarlaıdy QazAqparat tilshisi.
«Fire Finder» jobasynyń avtorlary – Aıdana Kenjebaeva men Samal Álı. Ekeýi de Nazarbaev zııatkerlik mektebiniń 10-synyp oqýshysy. Qurylǵy temperatýra jáne ınfraqyzyl sáýlelený sensorlarymen, sondaı-aq uıaly baılanys modýlimen jabdyqtalǵan. Jer qyzǵan kezde sıgnal berilip, órt týraly aqparat uıaly telefonǵa SMS habarlama arqyly keledi. Habarlamada janyp jatqan jerdiń kody nemese mekenjaıy jazylady. Qurylǵy 1 sharshy shaqyrym radıýstaǵy órtti anyqtaı alady.
«Meniń atam aýyl sharýashylyǵy salasynda eńbek etedi. Jyl saıyn órttiń qanshalyqty shyǵyn ákeletinin estımin. Dala jáne orman alqaptary órtiniń bar-joǵyn eshkim ýaqytynda anyqtaı almaıdy. Sondyqtan bul taqyryp meni alańdatady», - dedi Aıdana Kenjebaeva.
Oqýshylardyń jobasy Pavlodarda ótken ulttyq chempıonatta tanystyryldy. «Aqyldy qala» nomınatsııasy boıynsha birinshi orynǵa ıe boldy. Jaqynda joba «QHA Jastar Sınergııasy» respýblıkalyq forýmynyń eń úzdik 13 jobasy qataryna kirdi.
«Jas ónertapqyshtar órt anyqtaǵysh quralyn 3 ret óńdep shyǵarǵan. Robototehnıka úıirmesiniń jetekshisi Baýyrjan Shoqanov qurylǵy óte senimdi dep esepteıdi. Sebebi baılanys aıasynan tys jerde órt shyqsa da habarlama túsip turady», - dedi Nazarbaev zııatkerlik mektebiniń baspasóz qyzmetkeri Aıgerim Amanǵosova.
