Aqtóbelik oqýshylar qarapaıym gazetten syılyqtar ázirleıdi
AQTÓBE. QazAqparat - Aqtóbe oblysy Hromtaý aýdanynyń oqýshylary gazetti kádege asyryp júr. Olar gazetten qumyra, qobdısha, qalamsap toqyp, ata-anasyna beretin syılyqtardy ózderi ázirleıdi, dep habarlaıdy QazAqparat tilshisi.
Hromtaý aýdanynyń oqýshylary qaldyq zattarǵa «ekinshi ómir» syılaıdy. Olar qaǵaz maılyq, jelim, qatty karton, gazetti paıdalanyp, úıge qajetti ádemi buıymdar ázirlep júr.
«Qaǵazdan, bylǵarydan, gazetten, ártúrli qaldyq zattardan paıdaǵa jaramdy buıymdar ázirleımiz. Máselen, qaǵaz maılyqtan shyqqan karton qaǵazdan qalam, qaryndash salatyn qalamsap jasap shyǵaramyz. Keıbir oqýshylar qaǵaz maılyqtan kartınalar daıyndaıdy. Oǵan jaramsyz bolyp qalǵan dıski, úlken plastınkalar paıdalanylady. Peıp art - qaǵaz óneri. Gazetti shıyrshyqtap, keıin óremiz. Tez toqylady. Qatty bolýy úshin PVA jelimdi paıdalanamyz. Keıin gýashpen boıap, aerozol boıaýyn paıdalanamyz. Osy satydan ótken qaǵaz buıymdar óte ádemi ári sapaly»,- dedi Hromtaý aýdandyq mektepten tys ortalyǵynyń qyzmetkeri Saltanat Joldybaeva. Oqýshylarǵa tapsyrys beretinder de kezdesedi. Qolóner úıirmesine qatysýshy balalar kóbine ata-anasy men ustazdaryna syılyq jasaýǵa áýes.
«Gazetti shıyrshyqtap orap, keıin odan qumyra toqımyz. Toqylǵan qumyrany marılmen, keıin lakpen boıap qoıamyn. Shamamen bir úlken qumyraǵa 10-15 gazet qajet bolady. Shıyrshyqtalǵan gazet bolsa, úlken qumyrany bir kúnde toqyp shyǵamyz. Munyń bárin biz ınternetten úırenip, keıin sol bilgenimizdi balalarǵa úıretp júrmiz. Ózim úırengen óner túrine qyzyǵýshylar kóp eken. Oblys ortalyǵyna shaqyryp, sheberlik sabaǵyn alatyndar da bar. Biz tegin úıretip, kómektesip kelemiz»,- dedi ortalyq mamany Aınash Dúısenova.
Aıta keteıik, dızaıner mamandyǵyn meńgergen Aınash Dúısenova ótken jyly oblys ákimi Berdibek Saparbaevtyń portretin toqyp, syıǵa bergen bolatyn.
