Aqtóbelik oqýshylar bir aıdan beri kitapsyz sabaq oqyp júr
Aqtóbe qalasyndaǵy №70 orta mektep bıyl paıdalanýǵa berildi. 900 oryndy mektepte qazir 1 myńnan astam bala bilim alyp júr. Onyń 141-i bıyl 1-synypqa barǵan. Arada bir aıǵa jýyq ýaqyt ótkenimen, oqýshylar kitapsyz bilim alýǵa májbúr boldy.
«Bıyl balamyz 1-synypqa baratyn bolǵan soń jańa mektepti tańdadyq. Biraq qazir sol mektepti tandaǵan ata-analar ókinip júr. Sebebi, oqýlyq joq. 1-synyp oqýshylary bir aı ýaqyt ótse de kitapsyz sabaqqa bardy. Al qosymsha dápterlerin satyp alýǵa ár ata-ananyń 7-10 myń teńge jumsaýyna týraly keledi. Synyp jetekshisi «kitap satyp al» dep mindetteı almaıdy, qorqady. Al sabaqty oqýlyqsyz ótkizý ózine qıyn. Balalarymyz mektepke barady, keledi. Keıbir ata-ana arnaıy qosymsha dápterin taba almaı shyryldap júr», - dep habarlady bir top ata-ana.
Shydamy taýsylǵan ata-analar mektep dırektory, qalalyq bilim bólimi men oblystyq bilim basqarmasynan máseleni sheshýdi suraıdy. Al mektep ákimshiligi kitaphanashy ózge mektepterden aýysqan kitapty jınap júrgenin aıtyp berdi.
«Jańa mektep bolǵan soń oqýlyq jetkiliksizdigi problemasy bar. Aldaǵy 1-2 kúnde bári sheshimin tabady dep esepteımiz. 1-synypqa barǵan 100-den astam balanyń 70 paıyzynda oqýlyq bar. Kitaphanashy ózge mektepten oqýlyq tasyp júr. Tek 1-synypqa emes, ózge synyp oqýshylaryna da kitap qajet»,- dedi №70 orta mektep dırektorynyń orynbasary Gúlzıpa Baıjanova.
Aıta keteıik, Aqtóbe qalalyq bilim bólimi kitap jetpegen soń ekinshi ret oqýlyqqa tapsyryp berip, jetkizilýin kútip otyrǵanyn habarlady.
«1-synypqa baratyn bala sany kóbeıip ketti. Sol sebepti qosymsha qarjy bólinip, oqýlyq endi kelip jatyr. Mindetti túrde oqýlyq taratylady»,- dedi qalalyq bilim bólimi basshysynyń orynbasary Dına Haletova.
