Aqtóbelik oqýshy jańa jyldyq shyrshaǵa Aqordadan táj, báıterekten kóılek kıip keldi
AQTÓBE. QazAqparat - Aqtóbede daryndy balalarǵa arnalǵan jańa jyldyq shyrsha erteńgiligi ótti. Oqýshylardyń biri Aqordadan táj, báıterekten kóılek kıip keldi, dep habarlaıdy QazAqparat tilshisi.
Aqtóbede jańa jyldyq shyrsha keshi jalǵasyp jatyr. Búgin 200-den astam daryndy bala jasyl shyrsha janynda án aıtyp, bı bıledi.
«Sońǵy on jylda 5 myńǵa jýyq bala olımpıadalardyń jeńimpazy boldy. Sizder sol balalardyń jalǵasy bolasyńdar. Óńirde salynyp jatqan mektep, sport, mádenıet oshaqtarynyń bári Sizder úshin. Sizder qazirgi zaman talabyna saı jańa tehnologııalardy, jańa baǵdarlamalardy ıgersin, dúnıejúziniń myqty joǵary oqý ornyna tússin, Qazaqstannyń damýyna úles qossyn degen tilek bar. Jaqsy oqyńdar! Eń negizgisi tártipti bolý kerek. Sport, ónermen aınalysý kerek. Sol kezde Dımash Qudaıbergen sııaqty qazaqtyń, Qazaqstannyń atyn dúnıejúzine shyǵarasyńdar», - dedi oblys ákimi Berdibek Saparbaev.
Syılyq alǵan balalar arasynda Áıteke bı aýdany, Aqtasty orta mektebinen kelgen Temirlan Orynbaev bar. Ol oblystyq «Jańa tolqyn» shyǵarmashylyq baıqaýynyń jeńimpazy, respýblıkalyq «Aqjeleń» konkýrsynyń laýreaty. Al Yrǵyz aýdanynan kelgen Aıkórkem Erkináli ıAssaýıtaný halyqaralyq baıqaýynyń kúmis medal ıegeri.
Aıta keteıik, búgin jańa jyldyq shyrshaǵa Qobda aýdanynan kelgen oqýshy Arýjan Jazıtova erekshe kıim úlgisimen keldi.
«Anam Marjangúl Tóleýova kıimdi arnaıy tikti. Tájim Aqorda, kóılegim báıterek. Ekeýi de Astanamyzdy sımvoly. Ózim Elordada bolmadym. Armanym - Astanany kórý, sol jaqta joǵary bilim alý. Ózim án aıtqandy unatamyn», - dedi Arýjan Jazıtova.
Kóılek atlas matadan tigilip, qaǵazdan záýlim ǵımarat pen báıretek japsyryldy. Al táji fetrden jasaldy.
