Aqtóbelik oqýshy Túrkııadan jeńispen oraldy
AQTÓBE. QazAqparat - Aqtóbe qalasyndaǵy Nazarbaev zııatkerlik mektebiniń 9-synyp oqýshysy Sanjar Hamıt Antalııada ótken halyqaralyq pán olımpıadasynyń jeńimpazy atandy, dep habarlaıdy QazAqparat tilshisi.
Sanjar Hamıt geografııa páninen І oryn, aǵylshyn tilinen ІІІ oryndy ıelendi. «Sanjar Hamıt 7 synypta oqyp júrgende aǵylshyn tilin jetik biletinin baıqaǵan bolatynmyn. Sodan ony mektep olımpıadasyna daıyndalýǵa shaqyrdym. Ol birinshi orynǵa ıe boldy jáne jeńis joly osylaı bastaldy», – dedi zııatkerlik mekteptiń aǵylshyn tili muǵalimi Janna Bakırshınova. Túrkııada ótken olımpıada eki bólimnen turdy. Olar testileý jáne pán men týrızm boıynsha praktıkalyq kezeń. Sanjar Hamıt geografııa olımpıadasynyń 160 qatysýshysynyń ishinen oza shyqty. «Olımpıadalardyń arqasynda ózin-ózi damytýǵa degen qyzyǵýshylyq paıda boldy. Antalııadaǵy jeńisten keıin men ózimdi ártúrli baǵytta synap kórgenim beker emes ekenin túsindim. Endi jańa belesterdi baǵyndyrýǵa tyrysamyn», – dedi 9 synyp oqýshysy S. Hamıt. Olımpıadaǵa jalpy bilim beretin mektepterdiń bastaýysh, orta jáne joǵarǵy synyp oqýshylary, Túrkııadan, Reseı Federatsııasynan jáne basqa TMD elderinen kelgen orta kásiptik bilim berý oryndarynyń stýdentteri qatysty.
