Aqtóbelik oqýshy tasjol beriktigin arttyratyn ádisti usyndy
Aqtóbedegi Nazarbaev zııatkerlik mektebiniń 12-synyp oqýshysy Gaýhar Ahtanqyzy avtokólik joldarynyń quramyndaǵy beton beriktigin arttyratyn hımııalyq qospany oılap taýyp, ónertabysyn patenttedi.
Jetekshileriniń ıdeıasyn iske asyrǵan zııatker 2 jyl ishinde aýqymdy zertteý jumysyn júrgizip, tájirıbe júrgizgen.
Jas ónertapqyshtyń sózinshe, jol sapasyn arttyrý úshin glıtserıd felon qyshqylyn paıdalanýǵa bolady. Bul – qospanyń eń negizgi komponenti.
«Hımııalyq qospany ázirleý uzaq protsess. Avtokólik joldarynyń qurylymy men qurylysyn zertteý, laboratorııalyq eksperıment ótkizý sekildi birneshe kezeńnen turdy. Qarapaıym kartopty pırolızdeý ádisi arqyly kerekti element, ıaǵnı, glıtserıd felon qyshqylyn aldyq. Keıin daıyn qospanyń ylǵal sińirgishtik qasıeti men júk kóterý múmkindigin anyqtadyq. Osylaısha ónimniń jol sapasyn jaqsarta alatynyma kóz jetkizdik», - deıdi jas ǵalym Gaýhar Ahtanqyzy.
Elimizde mundaı hımııalyq qospanyń analogy bar. Óndirýshiler ony qyzylshadan jasaıdy.
Alaıda Gaýhar Ahtanqyzy beton beriktigin nyǵaıtýǵa arnalǵan qospany kartoptan alǵan áldeqaıta tıimdi ári únemdi, óndirý de qıynǵa soqpaıdy dep esepteıdi.
Sondaı-aq hımııa pániniń muǵalim-moderatory Dastan Nazarovtyń jetekshiligimen júrgizilgen jobada elimizdegi joldardyń nelikten sapasyz ekeni qarastyrylǵan.
« Kóptegen merdiger kásiporyn jol salý tehnıkasynan qatelik jiberedi. Bul maman tapshylyǵy saldarynan bolady. Sondaı-aq kóptegen jol-qurylys kompanııasy qajetti qospany paıdalanbaıdy. Ony artyq shyǵyn dep esepteıdi. Biz osy máselelerdi eskerip, beton beriktigin saqtaıtyn únemdi qospa daıyndadyq « , - deıdi zııatker.
Aıta keteıik, 2019 jyly bastalǵan zertteý jumysy Aqtóbedegi Nazarbaev zııatkerlik mektebiniń bazasynda júrgizildi.
Munda tájirıbe jasaýǵa barlyq múmkindik qarastyrylǵan.
Endi daıyn qospany óndiriske usyný úshin sertıfıkaı alyp, ǵylymı-tehnıkalyq saraptamadan ótkizý josparda bar.
Al mektep túlegi Gaýhar Ahtanqyzy bolashaǵan qurylys ınjenerııa salasymen baılanystyrǵysy keledi.
