Aqtóbelik oqýshy múgedek anasynyń kútimin jasap otyr
AQTÓBE. QazAqparat - Aqtóbelik oqýshy páteraqysynyń tólemi, kıim men tamaqtyń baǵasyn túgel biledi. Ol І-toptaǵy anasynyń bar kútimin jasap otyr, dep habarlaıdy QazAqparat tilshisi.
Aqtóbe oblysy, Embi qalasyndaǵy №7 mektep-ınternattyń oqýshysy Saǵynysh Jumabaı 6 jasynda ákesinen aıyrylyp, ózinen kishi baýyry jáne anasymen birge turady. Alǵashynda Muǵaljar aýdanyna qarasty 53-razezde turǵan otbasy balalar mektep-ınternatqa ornalasqan soń Embi qalasynan páter jaldady. Erte eseıgen oqýshy Saǵynysh anasymen ym arqyly sóılesedi. Bárin ózi úırengen, úı jumystaryna da shıraq.
«Aýyldan qalaǵa kelgen soń páter jaldaýǵa týra keldi. Páter aqysy 15 myń teńge. Meniń 3-synypta oqıtyn inim bar. Ol da mektep ınternatta jatady. Ekeýmiz bir jerde bolamyz, anamyz surap alsa úıge baryp qonamyz. Internatta jaǵdaıymyz jaqsy, tek anamyzdy ýaıymdaımyz», - dedi mektep oqýshysy Saǵynysh Jumabaı.
Ol qujat tapsyrý, toltyrý jumystary kezinde anasynyń janynda júredi. Fýtbolshy bolýdy armandaıtyn Saǵynysh jaqsy oqıdy, inisiniń sabaǵyn oryndaýǵa kómektesedi.
«Anamdy men túsinip, qujat toltyratyn jerlerge ertip aparamyn. Úıde de únemi kómektesip, anamnyń janynda júremin»,- dedi mektep oqýshysy.
Aıta keteıik, bul otbasy balalaryna «Mektepke jol» aktsııasymen kómek kórsetildi. Al ákimdik sońǵy jyldary qalaǵa áleýmettik páter salynbaǵanyn jetkizdi.
«Bul otbasyny bilemin. Balalar mektep-ınternatta jatyr. Eger Embide bos turǵan úıler jóndelip, paıdalanýǵa berilse, birinshi kezekte páter sol adamdarǵa beriledi», - dedi dedi Embi qalasynyń ákimi Álimjan Qorǵanbaı.
Eske salsaq, Embi qalasynda 5 qabatty turǵyn úıler qańyrap tur. Keler jyly memlekettik-jekemenshik seriktestik aıasynda jóndelýi múmkin.
