Aqtóbelik oqýshy memlekettik qyzmetkerlerge sybaılas jemqorlyq týraly dáris oqydy

AQTÓBE. QazAqparat - Aqtóbede №63 orta mekteptiń 8-synyp oqýshysy Dıana Seıitova memlekettik qyzmetshilerge sybaılas jemqorlyq týraly dáris oqydy, dep habarlaıdy QazAqparat tilshisi.

QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń oblystyq departamenti Aqtóbe qalasy Almaty aýdanynyń memlekettik qyzmetshilerimen jıyn ótkizdi. Kezdesýge oqýshylar men ımamdar, psıhologtar, aqsaqaldar, memlekettik qyzmetshiler qatysty.

«Ótirik el arasynda senimsizdik týǵyzady. Al biz týǵan-týystarymyz ben jaqyndarymyzdyń janynda, táýelsiz, quqyqtyq memlekette ómir súrgimiz keledi. Sondyqtan sybaılas jemqorlyqpen birlese kúresýge shaqyramyn», - dedi №63 orta mekteptiń 8-synyp oqýshysy Dıana Seıitova.

Jıynǵa qatysýshy ımam sybaılas jemqorlyqtyń kúná ekenin, al aqsaqaldar óskeleń urpaqty tárbıeleýge keri áserin tıgizetinin aıtty. Psıholog para berý arqyly máseleni sheshý opa tapqyzbaıtynyn túsindirdi.

«Jıynǵa qatysqan memlekettik qyzmetshiniń áıeli adal jolmen tapqan tabysqa qanaǵat etýdi eske saldy. Sebebi keıde áıeliniń suranysyn oryndaýǵa bel býǵan er adam táýekelge baryp, týra joldan taıyp ketedi. Aldaǵy ýaqytta mundaı kezdesýler jalǵasyp, meılinshe kóp adamdy qamtý josparlanyp otyr», - dep habarlady QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń oblystyq departamentiniń baspasóz qyzmeti.

Jıyn kezinde oblystyq departament basshysy Rasýl Medetov te óz oıyn bildirdi.

«Sybaılas jemqorlyqqa barǵan adam óz ómirine balta shabady, kúná arqalaıdy. Qoǵamǵa qansha paıda ákelseń de, bir ret para alý bárin tekke ketiredi. Aqsha týǵan-týystaryń men bostandyǵyńnan artyq emes», - dedi ol.