Aqtóbelik oqýshy qyzdar sholpysy syldyrlap sabaqqa baryp júr
AQTÓBE. QazAqparat -Aqtóbedegi №31 orta mekteptiń oqýshy qyzdary mereke kúnderi mektepte sholpy taǵady, dep habarlaıdy QazAqparat tilshisi.
Aqtóbe qalasyndaǵy №31 orta mekteptiń qyzdary mereke kúnderi sholpy taǵady. «Sholpy» klýbynyń músheleri shashqa taǵatyn áshekeıdi ózderi daıyndap alǵan.
«Aqtóbe oblysyndaǵy «Sholpy» klýby bizdiń mektepten de ashyldy. Qazir 500-ge jýyq oqýshy qyz osy klýbtyń múshesi. Olar úshin arnaıy bólme berildi. Qyzdar bos ýaqytynda qolóner buıymdaryn daıyndaıdy, keıbiri ony satady. Aldaǵy ýaqytta túlekterimizdiń bıznesine aınalady degen senim bar. Ári bul ulttyq salt-dástúrimizdi jańǵyrtýǵa arnalǵan jumys»,- dedi mektep muǵalimi Oryngúl Іdirisova.
№31 orta mektepte barlyǵy 1500-ge jýyq oqýshy bar. Olardyń 800-den astamy qyzdar. Ustaz Oryngúl Іdirisovanyń aıtýynsha, qyzdardyń 80 paıyzdan astamy burymdy. Bir-biriniń shashyn órip, úlgi kórsetetin qyzdar qaladaǵy qyz synyna jıi qatysyp turady.
«Oqýshy qyzdar únemshil, kishipeıil. Olar týǵan kúnine berilgen monshaqtardy, anasyna qajet bolmaǵan áshekeıdi ákelip, jańa buıym daıyndaıdy. Qyzdar ózderi taǵyp júrgen sholpynyń jasalýyn aqtóbelik sheber Bolat Atraýbaevtan da úırendi. Sonymen qatar, tarıhı-ólketaný murajaıyna baryp, áshekeılerdiń shyǵý tarıhymen tanysty. Qazir olar sholpy men óńirjıek jasaıdy. Bári onyń shyǵý tarıhyn bilip, sholpy taǵýǵa umtylady»,- dedi Oryngúl Іdirisova.
Aıta keteıik, qazirgi kezde №31 orta mekteptiń bul tájirıbesin ózge bilim ordalary úlgi etip, tárbıelik ádisteme retinde qoldanysqa engizip jatyr.
