Aqtóbelik oqýshy kólikterge tehnıkalyq qyzmet kórsetetin ortalyq ashyp aldy
AQTÓBE. QazAqparat - Aqtóbelik oqýshy Serik Berikuly 14 jasynda kásipker atandy. Ol kólikterge tehnıkalyq qyzmet kórsetý ortalyǵyn ashty, dep habarlaıdy QazAqparat tilshisi.
Aqtóbe oblysy Temir aýdanynyń ortalyǵy Shubarqudyqta turatyn Serik Berikuly qazir kólik jóndep júr. Shubarqudyq gımnazııasynyń oqýshysy tehnıkalyq qyzmet kórsetý ortalyǵyn ashyp, tabys tabýǵa kóshken. Oqýshy matematıka páninen olımpıadalarǵa qatysyp, tipti ǵylymı jetekshisimen birge jańalyq ashyp júr.
«Serik Berikuly 7-synyptan bastap ǵylymı jumystar jazyp júr. Qazir ol 9-synyp oqýshysy. Matematıka páni boıynsha mektepte, aýdan, oblysta olımpıadalarǵa qatysyp júr. Qospany aralastyrý esebi boıynsha ǵylymı jumys jazýda. Tuzǵa sý, qumǵa tsement aralastyrý kezindegi esepke arnaıy formýla oılap tapty. Eki ádisi bar. Ótken jyly esh nátıje bermegenimen, bıyl «Daryn» ǵylymı jumystar baıqaýynda ekinshi oryn aldy», - dedi Shubarqudyq gımnazııasynyń muǵalimi Tımýr Sarın.
Mektep oqýshysy aldymen kompıýterlik dıagnostıkaǵa arnalǵan baǵdarlamany satyp aldy.
«Ákesi kólik aıdap, jóndeýine kómekteskende qyzyǵýshylyǵy artyp, dıagnostıka qoıýdy úırendi. Baǵdarlamasyn satyp alýǵa 40 myń teńgeden astam aqshasyn jumsady. Ótken jyly osy isti bastaǵan bolatyn. Kólik jóndeýdiń bárin ózi meńgerdi. Oqýshy óte alǵyr, matematıka pánine júırik», - dedi Tımýr Sarın.
Oqýshyny Temir aýdanynyń ákimi Joldas Qalmaǵambetov qabyldap, estelik syılyq tabys etti.
«Serik Berikuly Shubarqudyq gımnazııasynyń oqýshysy, jasy on tórtte. Ata-anasy, baýyrlarynyń qoldaýymen birneshe jyldan beri kólik jóndeýge mamandanǵan. Tehnıkalyq qyzmet kórsetý ortalyǵyn jalǵa alyp, halyqqa qyzmet kórsetedi. Onyń qyzmetine júginýshiler qatary kóp, tabysy da az emes. Óskende ınjener bolady jáne de ata kásibimiz mal sharýashylyǵymen aınalysqysy keledi. Til kózim tasqa, meni Serik qatty tańqaldyrdy», - dedi aýdan ákimi.
