Aqtóbelik oqýshy beti ashyq jatqan qudyqqa túsip ketti
AQTÓBE. QazAqparat - Aqtóbede 4 synyp oqýshysy ashyq turǵyn qudyqqa túsip ketti. Tereńdegi 2-3 metr bolatyn qudyqtan qurylysshylar alyp shyqty, dep habarlaıdy QazAqparat tilshisi.
Aqtóbe qalasyndaǵy Batys-2 yqsham aýdanynda sabaqtan soń úıine bara jatqan oqýshy qudyqqa túsip ketti. Qaqpaǵy joq, qardan kórinbeı qalǵan qudyqtyń tereńdigi 2-3 metr bolady.
«Oqýshy qudyqqa túsip ketken kezde janyndaǵy balalar kórip, adamdardy kómekke shaqyrǵan. Sol kezde qurylysshylar kómekke kelip, alyp shyqty. Jádel járdem de shaqyryldy. 4 synyp oqýshysynyń densaýlyǵyna esh zaqym kelmedi, sabaǵyn oqyp júr. Negizi mektep ujymy apta saıyn senbilikke shyǵyp, ashyq turǵan qudyq anyqtalsa, Aqtóbe qalasy, Astana aýdanynyń ákimdigine sýretin jiberedi. Bul jaǵdaı mektep aýmaǵynan tys jerde boldy. Synyp jetekshisi qudyqqa túsip ketkenin estigen boıda baryp, jaǵdaıy jaqsy bolǵan soń úıine apardy», - dedi M.Dýlatov atyndaǵy orta mektep-lıtseıiniń dırektory Dámeli Qartpaǵambetova.
Ata-anasy qudyqtyń dál qasyndaǵy jedel járdemge baryp, balasyn qaratyp aldy. Oqýshy ózin jaısyz sezinbegenin, jaraqaty joq ekenin aıtyp bergen.
«Qyzym din aman. Eshkimge shaǵym jasap, aryz jazbadym. Biraq qalalyq turǵyn úı-kommýnaldyq sharýashylyǵy bólimine telefon shalyp, eskertý berdim. Memlekettik mekeme «bizdiń balansymyzda joq, «Aqtóbe Sáýlet» kompanııasy jaýapty» dep aıtty. Aman-saý bolǵan soń shúkir etip otyrmyn. Sol kúni qyzymdy qudyqtan arqanmen tartyp, shyǵaryp alǵan adamdarǵa alǵys aıtamyn»,- dedi oqýshynyń anasy Aısulý Qoılybaeva.
Aqtóbe qalasy ákimi baspasóz qyzmetiniń habarlaýynsha, qudyqqa jaýapty qurylys kompanııasyna ony jabý týraly tapsyrma berildi.
«Qudyq kimge tıesili ekeni anyqtalyp, jabyldy», - dep habarlady ákimdik. Alaıda qudyq talapqa saı qaqpaqpen emes, qurylys materıalynan qalǵan aǵashpen jabýly tur.
Eske salaıyq, osyǵan deıin Astanada 14 jasar oqýshy qyz káriz qudyǵyna qulap, qaza tapqan bolatyn.
