Aqtóbelik munaıshylar jalaqyny ósirýdi surap otyr
AQTÓBE. QazAqparat - Aqtóbedegi iri munaı kompanııasynyń jumysshylary jalaqy ósirýdi surady. «SNPS-Aqtóbemunaıgaz» AQ-y sońǵy úsh jylda eńbekaqy kóterilmegen. Álemdik naryqtaǵy munaı qunynyń tómendeýi kezinde shydamdylyq tanytqan jumysshylar baǵa turaqtalǵan soń kompanııa basshylyǵyna ótinishterin jetkizdi, dep habarlaıdy «QazAqparat» tilshisi.
«SNPS-Aqtóbemunaıgaz» AQ óńirdegi munaı óndirisiniń 67, gazdyń 88 paıyzyn qamtyp otyr. Munda 6 myńnan adam jumys isteıdi. Ótken jyldaǵy munaı baǵasynyń turaqsyzdyǵyna qaramastan barlyq áleýmettik mindetter oryndalǵan, jalaqy ýaqytyly tólengen. Degenmen, kemshin tustar da jeterlik. Munaı óndirisi 10 paıyzǵa tómendep, ınvestıtsııa tartý kórsetkishi 34 paıyzǵa azaıdy.
«Ótken jyly kompanııadaǵy qyzmetkerler sany 168-ge qysqardy. Kelisim boıynsha 55 myń tonna suıytylǵan gaz óndirilýi tıis edi. Nátıjesinde 48 myń tonna óndirildi. Al jalaqy 10 paıyzǵa kóterilýi tıis edi. Bar bolǵany 1,5 paıyzǵa ósti»,- dedi oblys ákimi Berdibek Saparbaev.
Munaı kompanııasy ótken jyly 4 mıllıon 121 myń tonnadan astam «qara altyn» óndirdi. Al gaz óndirý bıyl rekordtyq kórsetkishke jetip, 5 mıllıard 759 mıllıon tekshe metrdi qurady. Kólikke tutynyp júrgen suıytylǵan gaz kólemi 470 myń tonnadan asty. Kompanııa shıki munaıdy Qazaqstan naryǵyna berýin ári qaraı jalǵastyryp jatyr. Bas dırektor Van Tszıýnjenniń aıtýynsha, óndirilgen munaıdyń teń jartysy elimizdiń munaı óńdeý zaýyttaryna beriledi eken. Al suıytylǵan gazdyń teń jartysy ishki naryqqa baǵyttalǵan. Munan ózge tabıǵı gazdy Aqtóbeden ońtústik óńirler tasymaldap jatyr. Jetistikterge toly esepten soń oblys ákimi eki suraq qoıdy. Munaı óndirý kólemi jumys ornyn saqtaý jaıyn bildi.
«Bul eki suraqqa jaýap berý óte qıyn. Qazir munaı óndirý kóleminiń tómendeýine ken oryndaryndaǵy qara altynnyń sarqylýy da áser etip tur. Eger jańa ken oryndary anyqtalsa, biz munaı óndirýdi ári qaraı jalǵastyryp, ótken jyldyń kórsetkishin saqtaımyz. Al jumysshylarǵa keler bolsam, eńbek kelisim shartyn oryndap, kompanııanyń damýy úshin úles qosatyn kez kelgen adamnyń jumys orny saqtalady. Al talapqa baǵynbaǵan jumysshylardy ustap otyra almaımyz», - dedi «SNPS-Aqtóbemunaıgaz» AQ bas dırektory Van Tszıýnjen.
Munaı kompanııasy sońǵy úsh jylda jalaqy kótermedi. Óndiris ornynyń kásipodaq uıymy jaǵdaıdyń turaqtalǵanyn aıtyp, bıyl bas dırektorǵa jumysshylardyń eńbekaqyny ósirý týraly ótinishin jetkizdi. Kezdesýden soń kompanııa, oblys ákimdigi men kásipodaq úshjaqty memorandýmǵa qol qoıdy.
Altynaı Saǵyndyqova
