Aqtóbelik munaıshylar ekologııalyq ústemaqynyń bir bóligin sot arqyly óndirip aldy

AQTÓBE. QazAqparat – Aqtóbedegi munaı kompanııasynyń jumysshylar sot arqyly ekologııalyq ústemaqyny talap etti. Sot tek bir jyldyq aqshany óndirýge sheshim shyǵardy, dep habarlaıdy QazAqparat tilshisi.

«Saǵyz Petroleým Kompanı» JShS-in 50-den astam jumysshysy sotqa berdi. Olar 2013 jyldan beri zań boıynsha tıesili ekologııalyq ústemaqyny almaǵan, tipti, ózderine bul aqshanyń tıesili ekenin bilmegen. Búgin №2 qalalyq sotta sheshim shyǵaryldy. Saǵyz Petroleým Kompanı» JShS-ne jumysshylarǵa ekologııalyq ústemaqy tólem berý mindetteldi. Biraq jumysshylar kútkendeı 6 jyldyq emes, bir jyldyń aqysy esepteldi.

«Munaı kompanııasy ornalasqan jer ekologııalyq aımaqqa jatady. Sondyqtan zań boıynsha ekologııalyq ústemaqy jalaqyǵa qosylýy tıis. Degenmen sot aryzdy ishinara qanaǵattandyrdy. 2017 jyldyń tamyzy men 2018 jyldyń maýsym aıyna deıingi aralyq óndiriledi. Jumysshylardyń ózderi 2017 jyldyń tamyzynda bilgen. Al 2013 jyldan 2017 jyldyń tamyzyna deıingi aralyqty óndirý aryzyn qanaǵattandyrýsyz qaldyrdy. Sebebi aryz túsirý ýaqyty ótip ketken», - dep túsindirdi sýdıa Nazgúl Qanapııa.

Jumysshylar bul sheshimge kelispeıtinderin, apellıatsııalyq shaǵym túsiretinin jetkizdi.

«Men sot sheshimimen kelispeımin. Biz shyn máninde bilmeı qaldyq, ýaqyt ótkizip alǵanymyz bizdiń kinámiz emes. Mindetti túrde qaıta aryz jazamyz, Joǵary sotqa deıin baramyz. Maǵan 1,9 mıllıon teńge berý kerek edi, sot tek 200 myń teńgeni óndirildi», - dedi munaıshy Ǵalymjan Baıbolsynov.

Aıta keteıik, munaı kompanııasynda 400-den astam jumysshy bar. Olardyń tek bir bóligi ǵana sotqa júginip, óz quqyqtaryn qorǵady.