Aqtóbelik múmkindigi shekteýli jandar jumysqa ornalaspaq
«Nur Otan» partııasynyń oblystyq fılıaly «Kedergisiz keleshek» jobasy aıasynda qoǵamdyq qabyldaý ótkizdi. Qabyldaýǵa 32 múmkindigi shekteýli jan qatysyp, óz ótinishterin aıtty.
«Alash» múgedekter qoǵamynyń 50-den astam múshesi bar. Búgin olardyń kóbi qoǵamdyq qabyldaýǵa qatysyp, rıza bolyp shyqty. Biriniń oqý aqysy tólense, biri múgedektik arba alatyn boldy. Al jumysqa ornalasýǵa kómek suraǵandar úshin jaqynda arnaıy bos jumys oryndar jármeńkesi uıymdastyrylady. Munyń bári biz úshin úlken kómek. Osy oraıda múmkindigi shekteýli jandarǵa qyzmet kórsetýge baǵyttalǵan Coworking ortalyǵyn ashyp, bizdiń shyǵarmashylyqpen aınalysýymyzǵa, óz múmkindikterimizdi damytýǵa jaǵdaı jasaǵany úshin partııaǵa alǵysymdy aıtamyn», - dedi «Alash» múgedekter qoǵamynyń tóraǵasy Álibek Eleýsizov.
Qoǵamdyq qabyldaýda óz kásibin ashý úshin kómek suraǵandar da boldy. Aqtóbe oblysynyń jumyspen qamtýdy úılestirý jáne áleýmettik baǵdarlamalar basqarmasy basshysynyń orynbasary Gúlzada Almatbaeva olarǵa oblys boıynsha 149 grant bólingenin, kez kelgen adam óz jobasyn usyna alatynyn aıtyp berdi. Al qalalyq máslıhattaǵy «Nur Otan» fraktsııasy múshesi Altynaı Muhanovanyń qabyldaýyna 7 adam keldi.
Depýtat І-top múgedegi Álibek Eleýsizdiń jumysyna qajetti qural-jabdyqtardy alyp berýge, І-top múgedegi Marat Seıtımovtyń oqý aqysyn tóleýge, sondaı-aq kásipkerlerdiń kómegimen kópbalaly ananyń saıajaıdaǵy úıin keńeıtýge ýáde berdi. 
