Aqtóbelik múgedek tapsyryspen aıyna 100 jınalmaly besik jasap júr
AQTÓBE. QazAqparat - Aqtóbe qalasynda turatyn І top múgedegi Telman Muqashev Qazaqstannyń ár óńirinen tapsyrys alyp otyr. Sheberhana aıyna 100 besikke tapsyrys alady, dep habarlaıdy QazAqparat tilshisi.
Aqtóbe qalasynda turatyn Telman Muqashev 2 jyl buryn sheberhana ashqan. Ol aǵashtan jınalmaly besik, ústel, oryndyq jasaıdy. Qyz jasaýyna qajetti sandyq ta bar. Sońǵy jyldary sánge aınalǵan et tabaqty da qaıyń aǵashynan oıyp jasaıdy. Qajetti aǵashtyń bári arnaıy tapsyryspen Bashqurtstannan ákelinip jatyr.
«Ózim 1978-1980 jyldary aralyǵynda Otan aldyndaǵy boryshymdy ótedim. Ol kezde Semeı polıgony zardabyn zalalsyzdandyrý jumystaryna qatysyp, arada ondaǵan jyl ótkende densaýlyǵym syr berdi. 2006 jyly eki aıaǵymdy kestirdim. Qazir І top múgedegimin. Sońǵy 2 jylda kásippen aınalysyp, balamdy janyma aldym. Oǵan aǵash oıýdy, besik, ústel, oryndyq, sandyq jasaýdy úırettim. Qazir bárin tapsyryspen isteımiz. Aqtóbede ǵana emes, elimizdiń ár óńirinde bizdiń qolymyzdan shyqqan buıymdar bar. Bári rıza, alǵysyn aıtyp jatyr. Biz aıyna 100 besik daıyndaımyz, baǵasy 25 myń teńge», - dedi sheber Telman Muqashev.
Ózge óńirlerdiń tapsyrystary poshta arqyly jóneltiledi. Súıikti isin kásipke aınaldyrǵan Telman Muqashev janyna birneshe adamdy jumysqa alǵan. Bar jaýapkershilik uly Abylaı Muqashevqa júktelgen. Ákeden kórgenin oıǵa túıip, aǵash oıýdy meńgergen uly bıznesti damytyp otyr. Qazir jınalmaly besikke tapsyrys kóp.
«Jınalmaly besik jasaýdy ózim oılap taptym. Arnaıy qural-jabdyqtaryn satyp alyp, shaǵyn tsehta jumys istep jatyrmyz. Elimiz boıynsha jınalmaly besikti tek bizder daıyndaımyz. Sapasy joǵary bolǵan soń jan-jaqtaǵy satyp alýshylarymyz rızashylyǵyn bildiredi. Tapsyrys berýshiler keıde kólemin aıtady. Et tabaqtary búgin aǵashtan jasalady. Tabaq jasalǵan soń maımen óńdelip, lakpen syrlanady», - dedi Telman Muqashev.
