Aqtóbelik múgedek Qytaıǵa baryp em qabyldaý úshin Saparbaevtan kómek surady
AQTÓBE. QazAqparat -Aqtóbede qalasynyń turǵyny Ulan Syrǵabaev óńir basshysy Berdibek Saparbaevtyń kezdesýine baryp, demeýshi bolýdy surady. Ol Qytaıda em qabyldaǵysy keledi, dep habarlaıdy QazAqparat tilshisi.
Aqtóbe oblysynyń ákimi Berdibek Saparbaevtyń esebi kezinde baspana, jer máselesi qozǵaldy. Sonymen qatar, múmkindigi shekteýli azamattar alǵys aıtyp, balalaryn shetelge emdep kelgen otbasylar rızashylyǵyn bildirdi. Al І top múgedegi Ulan Syrǵabaev Qytaıda em qabyldaý úshin demeýshi taýyp berýdi surady.
«On jyldan beri múgedektik arbada otyrdym. Ońaltý ortalyqtarynda em qabyldap, kúnde jattyǵý jasaımyn. Jattyǵý zaly bolmasa da shvedtik baspaldaqty paıdalanyp júrmin. Munyń da paıdasy az. Ózim bir ret Qytaıǵa baryp kelip, aıaǵymdaǵy barmaqtarym qozǵaldy. Kóp úmit artyp otyrmyn. Demeýshi taýyp berseńiz taǵy baryp em qabyldap, júrip ketemin dep oılaımyn. Meniń ómir súrgim keledi. Balamdy tárbıelesem deımin»,- dedi múgedek Ulan Syrǵabaev.
Aqtóbe oblysy boıynsha 24 myńnan astam múgedek bar. Onyń 5 myńnan astamy bala. Aqtóbe qalasynda turatyn múmkindigi shekteýli jandar bir qoǵamǵa birigip, óz máselelerin jergilikti bılikke jetkizip júr.
«Bul usynysty orynbasarym Erbol Nurǵalıevke tapsyramyn. Kásipkerlerdiń, óndiris oryndarynyń kómegimen «Paryz» qory quryldy. Maqsatymyz - múmkindigi shekteýli jandarǵa kómek berý, qoldaý. Aýyratyn, múgedek balalarǵa da kómektesemiz»,- dedi Aqtóbe oblysynyń ákimi Berdibek Saparbaev.
