Aqtóbelik muǵalimder oqýshylarynyń qylmysyn jasyrǵany úshin jazalandy
AQTÓBE. QazAqparat - Aqtóbede oqýshylardyń qylmysyn jasyrǵan muǵalimder men mektep dırektorlary ákimshilik jaýapqa tartyldy. Olardyń árqaısysy 100 myń teńgeden astam aıyppul tóledi, dep habarlaıdy QazAqparat tilshisi.
Jańa oqý jyly bastalǵanda Aqtóbe oblystyq jergilikti polıtsııa qyzmeti mektep, kolledj oqýshylaryna jaýapty bilim mekemeleriniń basshylary men muǵalimderdi jınady. Oblystyq jergilikti polıtsııa qyzmetiniń bastyǵy Qanybek Jaqsyǵalıevtiń aıtýynsha, óńirde jasóspirimder arasyndaǵy qylmys eki ese kóbeıgen. Sonymen qatar, aýyr qylmys jasaǵandar da tirkeldi.
«Jasóspirimder arasyndaǵy qylmys aýdandarda, qalada ósip otyr. Jyl basynan beri ishki ister organdaryna 3 myńnan astam jasóspirim jetkizildi, olardyń 500-den astamy esepke alynyp, 45 ata-ana quqyǵynan aıyryldy. Túngi klýbtarǵa jasóspirimderdi kirgizgen 60 jeke kásipker ákimshilik jaýapqa tartyldy. Áıteke bı, Hromtaý, Muǵaljar, Shalqar, Qarǵaly aýdandarynda qylmys ósti. Onyń ishinde aýyr qylmys jasaǵandardyń qatary artty. Top bolyp qylmys jasaıtyndar mektep, kolledj oqýshylary arasynda kóp. Olar qaraqshylyq, urlyq, alaıaqtyq, buzaqylyq jasaǵan»,- dedi oblystyq jergilikti polıtsııa qyzmetiniń bastyǵy Qanybek Jaqsyǵalıev.
Jıyn kezinde qalaǵa bilim alýǵa kelgen kolledj oqýshylarynyń 80 paıyzy páter jaldap turatyny, olardyń keshki ómiri baqylaýsyz qalǵany aıtyldy. Sonymen qatar, tártibi nashar balalardy kolledjge jiberip, óz bedelin oılaıtyndar áli de bar. Osy aralyqta oqýshy keıde oqýǵa túspeı, mektepke barmaı baqylaýsyz qalady.
«Jasóspirimderge der kezinde shara qoldaný kerek. Al bizdiń muǵalimder men ata-analar balalardyń qylmysyn jasyrady. Máselen, bıyl óńirde bilim salasynyń 6 qyzmetkeri ákimshilik jaýapqa tartyldy. Bári balalardy qorǵap, qylmysty jasyrdy. Olardyń arasynda mektep, kolledj muǵalimderi bar. Árqaısysy 100 myń teńgeden astam aıyppul tóledi. Pedagogtar qazir jasyrsa, erteń aýyr qylmys jasaýy múmkin ekenin umytpaǵany jón»,- dedi Qanybek Jaqsyǵalıev.
