Aqtóbelik muǵalim ulttyq kádesyı jasaýdy kásipke aınaldyrmaq
AQTÓBE. QazAqparat - Aqtóbe oblysy, Áıteke bı aýdany, Qarabutaq aýylynda turatyn muǵalim Jetkizgen Kúntýǵanov sońǵy jyldary ulttyq kádesyılarǵa suranys artqanyn jasyrmaıdy. Tipti mektep oqýshylary daıyndaǵan et tabaǵy men birneshe shaǵyn kádesyılarǵa tapsyrys túsip, jármeńke kezinde tez satylyp ketken, dep habarlaıdy QazAqparat tilshisi.
Aqtóbelik mektep oqýshylary eńbek páninde ulttyq buıymdar jasaýdy úırenedi. Bul oqýshylardyń usynysymen, yntasymen bastalǵan is. Jaýyrynnan qobyz, aǵashtan dombyra men et tabaǵyn, túrli ydys-aıaq pen as úıde qoldanatyn buıymdar jasap júrgen oqýshylar muǵalimine oı saldy. Eńbek pániniń muǵalimi Jetkizgen Kúntýǵanov ulttyq kádesyı jasap, ony kásipke aınaldyrýǵa esh kedergi joq ekenin aıtyp berdi.
«Ulttyq kádesyılardy jasaýdy taıaýda ǵana qolǵa aldyq. Balalardyń qyzyǵýshylyǵy joǵary. Mektepte eńbek páninde qamshy, et tabaǵyn jasap júrmiz. Sandyq ta bar. Qoı súıekterin de kádege asyramyz. Jambastan qobyz daıyndadyq. Munyń bárin daıyn kúıinde, kádesyı dep shetelden ákeledi. Óz jerimizde da jasap, daıyndaýǵa bolady»,- dedi J.Kúntýǵanov. 
Qudaıbergen Jubanov atyndaǵy Aqtóbe memlekettik ýnıversıtetiniń Eńbek jáne bıznes fakýltetin bitirgen muǵalimniń aıtýynsha, buryn eńbek sabaǵynda ulttyq buıymdar múlde jasalmaǵan.
«Buryn eńbek sabaǵynda mundaı bolmady. Balalar ynta bildirip, osy baǵytta jumys istep jatyrmyz. Aldaǵy ýaqytta kásipker bolý oıda bar. Qazirgi kúni ulttyq buıymdarǵa tapsyrys bar. Ázirge qajetti qural-jabdyq, shıkizat alynbady. Shıkizat bolsa, qoldan kóp is keledi»,- dedi ol. 
Al onyń anasy Raıza Qaıyrbaeva da mektepte Sheber qoldar úıirmesin ashty. Sheber kez kelgen kıimdi qaıta tigip, jańa dúnıe ázirlep shyǵady. Qaǵaz ben qamyrdan birneshe ertegi keıipkerin ázirlep, mektep oqýshylaryna qajetti zattardy qaǵaz ben PVA jelimnen daıyndap júrgen ustaz bar ónerin balalarǵa úıretti. Sheber buryn esepshi bolsa, qazir 30 balany ulttyq ónerge úıretip, is tigýdi úıretin júrgen ustaz.
«Balalar eski zattardan jańa buıym ázirlegendi unatady. Aldyma kelgen oqýshyny keri qaıtaryp, qolyńnan is kelmeıdi dep shyǵaryp jibergenim joq. Qyzdardyń qolynan shyqqan ádimi buıymdy kórgen er balalar da kelip, bizge kómektesip, ózderi úırenip jatady. Al qajetti buıymdardy balamyz ekeýmiz satyp alamyz. Aǵashtar tabylady, eger joq bolsa, óz qarjymyzǵa alamyz. Keıbir balalardyń ata-analary qajetti zattardy bermeıdi. Odaı kezde men dúkenge baryp, qaryzǵa alamyn. Ónerde shekteý bolmaýy kerek»,- dedi R.Qaıyrbaeva. 
Sheber zamanaýı zattar jasaýdy ınternetten qarap alady. Beınematerıal qaı tilde bolsa da qoldan jasalǵan zatty úırený Raıza Qaıyrbaeva úshin qıynǵa soqqan emes. Taıaýda ol oqýshysymen birge aıyrqalpaq tigip, qazir Áıteke bıdiń músinin jasaýdy qolǵa alǵan. Bir kólikke júk bolatyn qolóner buıymdarynyń bári mektepte saqtaýly. Sheber óz qolynan shyqqan buıymdaryn úıine jınaǵan emes.
