Aqtóbelik muǵalim oqýshylardy synypqa jeke-jeke bıletip kirgizdi
AQTÓBE. QazAqparat - Aqtóbedegi №60 orta mektep muǵalimi Lázzat Nurmahan oqýshylaryn bımen qarsy aldy. Ánshi Erke Esmahannyń jeńgesi jańa ádistemelerdi aldaǵy ýaqytta da óz sabaq berý tásiline engizbek, dep habarlaıdy QazAqparat tilshisi.
Áleýmettik jelide oqýshylardy bımen qarsy alyp, ár balaǵa óz qımylyn úıretip qoıǵan muǵalim kópti tańǵaldyrdy. Aqtóbe qalasyndaǵy №60 orta mektep muǵalimi bul erekshe ádistemeni aldaǵy ýaqytta tolyqtyryp, ulttyq bıge basymdyq bermek.
«Ózim 1-synypqa jetekshimin. Úndi eliniń muǵalimi osy ádistemeni qoldanyp, oqýshylarymen birge bılegen eken. Men ata-analarmen aldyn ala aqyldasyp, Naýryz merekesine oraı ulttyq bımen balalardy qarsy alýdy josparladym. Sebebi, oqýshylardyń kóbi qalada týyp, ósip kele jatyr. Negizi mektepte dúısenbi kúni Ánuran oryndalady. Ózge kúnderi balalardy mýzykamen qarsy alamyn. Bar bolǵany 2 mınýtta jattyǵý aıaqtalady», - dedi Lázzat Nurmahan.
Ustaz ata-anamen baılanys jasap, balalardyń sabaqqa degen yntasyn arttyrýǵa bul ádistiń óz septigin tıgizgenin aıtty.
«Qazirgi zamanda uztaz ben ata-ananyń arasynda baılanys joq. Baılanysty nyǵaıtý maqsatynda usynys jasadym, olar qoldady. Balalaryna bı qımylyn úıretti. Kúnde ártúrli bı qımylyn alamyz. Ózim 33 jyldan beri bilim salasynda eńbek etemiz. Toppen jumys isteý ádisimen sabaq beremin», - dedi ol.
Uzaq jyl boıy bilim berý salasynda eńbek etip kele jatqan ustaz basshylyq, uıymdastyrýshylyq qyzmetterdi de qatar alyp júrgen. 50 jasqa tolatyn muǵalim 5 balany tárbıelep otyr. Lázzat Nurmahannyń ózi de sportpen shuǵyldanady. Aldaǵy ýaqytta jaqsy án tańdalyp, ulttyq bıdiń qımyldary jańa oqý ádistemesine qosylady.
Aıta keteıik, biraz ýaqyt buryn túrik muǵaliminiń oqýshylardy synypqa bıletip kirgizgen vıdeosy ınternette keń taralǵan edi.
